कामगारांमधील हाणामारीत एकाचा मृत्यू; आठ अटकेत

पिंपरी, ता. १६ : ‘मोठ्याने बोलू नका’, असे सांगितल्याच्या कारणावरुन ताथवडेतील अशोकनगर येथील एका कामगार वसाहतीमधील दोन गटांत हाणामारी झाली. त्यामध्ये एका कामगाराच्या डोक्यात लोखंडी हुक लागल्याने त्याचा मृत्यू झाला. या प्रकरणी वाकड पोलिस ठाण्यात परस्परविरोधी गुन्हे दाखल झाले असून पोलिसांनी आठ जणांना अटक केली आहे.
मसीह सोमरा मुंडा (वय ४०, रा. ताथवडे, मूळ रा. झारखंड) असे मृत कामगाराचे नाव आहे. या प्रकरणी सुकरा संगा इतवा मुंडा (वय २१, रा. अशोकनगर, ताथवडे, मूळ रा. झारखंड) यांनी वाकड पोलिस ठाण्यात फिर्याद दिली आहे. त्यानुसार पोलिसांनी माणिकचंद अकालू परिहार (वय २०), आनंद सुधीर परिहार (वय २०), मिथुन उमेश परिहार (वय ३२), ब्रह्मदेव सेलटू परिहार (वय १८, ताथवडे, मूळ रा. बिहार) यांना अटक केली आहे.
तर मिथुन उमेश परिहार (वय ३२) याने दिलेल्या फिर्यादीनुसार महादेव मुंडा (वय २०), विजय मुंडा (वय २२), तागू हुरो (वय २४), शाम मुंडा (वय २५), मसीह मुंडा (वय २५), खैरा हुरो (वय २०) यांच्यावर गुन्हा दाखल झाला असून यातील महादेव, विजय, तागू आणि शाम यांना पोलिसांनी अटक केली आहे.
मूळचे बिहार आणि झारखंडमधील हे सर्व कामगार अशोकनगर येथील अंटालिया कंस्ट्रक्शनच्या कामगार वसाहतीमध्ये राहतात. आपापल्या खोल्यांमध्ये दारू पीत असताना दोन्ही गटांतील कामगार आरडाओरडा करीत होते. त्यावरून दोन्ही गटांत भांडण सुरू झाले. पहिल्या घटनेत बिहारी कामगारांपैकी माणिकचंद परिहार याने खैरा हुरो याच्या डोक्यात सळई मारून जिवे मारण्याचा प्रयत्न केला. तर आनंद परिहार याने मसीह मुंडा यांच्या डोक्यात लोखंडी हुक मारून त्यांना जिवे मारले. तर दुसऱ्या घटनेत झारखंडच्या कामगारांनी बिहारचे कामगार आनंद, माणिक, करण आणि शामकुमार परिहार यांना लोखंडी पाईप, हातोडी आणि हूकने बेदम मारहाण करून जिवे मारण्याचा प्रयत्न केला.