‘एकातांत साधना करून वाटणारे तुकोबाराय निराळेच’

‘एकातांत साधना करून ती
वाटणारे तुकोबाराय निराळेच’

सरलाबेटचे मठाधिपती रामगिरी महाराज यांचे प्रतिपादन

पिंपरी, ता. १७ ः ‘‘एकातांत साधना करून आत्मकल्याण करणारे अनेक योगी जगतात होवून गेले आहेत. पण एकातांत साधना करून ती जगाला वाटणारे संत तुकाराम महाराज निराळेच आहेत,’’ असे प्रतिपादन सरलाबेट येथील श्री गंगागिरी महाराज संस्थानचे मठाधिपती, महंत रामगिरी महाराज यांनी येथे व्यक्त केले.
श्री क्षेत्र भंडारा डोंगर येथील संत तुकाराम महाराज यांच्या नियोजित मंदिराला महंत रामगिरी महाराज यांनी भेट दिली. त्यावेळी ते बोलत होते. यावेळी श्री विठ्ठल रखुमाई संत तुकाराम महाराज, भंडारा डोंगर ट्रस्टच्या वतीने रामगिरी महाराज आणि मधु महाराज यांचा सत्कार करण्यात आला. यावेळी ट्रस्टचे विश्वस्त रामभाऊ कराळे, सचिव जोपा पवार, जगन्नाथ नाटक-पाटील, अरुण काशीद, मनोहर ढमाले, विक्रम गव्हाणे, महेश शिंदे आदी उपस्थित होते.
रामगिरी महाराज म्हणाले, ‘‘संत तुकाराम महाराज यांची साधनाभूमी असलेल्या भंडारा डोंगरावरील दर्शनाने समाधान लाभले. याच डोंगरावर तुकाराम महाराज यांना आध्यात्मिक उर्जा मिळाली. तसेच साक्षात विठ्ठलाचे दर्शन झाले. त्यामुळे ही भूमी पवित्र आहे. पूर्णश्रद्धेने डोंगरावर येणाऱ्या प्रत्येकाला संत तुकाराम महाराज यांचे चैतन्य जाणवल्याशिवाय राहत नाही.’’
--------------
५०६९८
भंडारा डोंगर ः सरलाबेट येथील श्री गंगागिरी संस्थानचे मठाधिपती महंत रामगिरी महाराज यांनी भंडारा डोंगरावरील संत तुकाराम महाराज यांच्या मंदिराला भेट दिली. त्यावेळी त्यांचा सत्कार करण्यात आला.