वाकडमध्ये ‘अग्निशमन’चे प्रात्याक्षिक

पिंपरी, ता. १७ ः महापालिकेच्या रहाटणी उपअग्निशमन केंद्रामार्फत वाकड परिसरातील पंचतारांकित हॉटेलमध्ये मॉक ड्रिल (प्रात्याक्षिक) करण्यात आले. आपत्कालीन परिस्थिती व अग्निदुर्घटनेच्या प्रसंगी नागरिक व हॉटेलमधील कर्मचाऱ्यांची सुरक्षित सुटका कशी करावी? याबाबत मार्गदर्शन केले. आग लागल्यास धुरामुळे गुदमरण्याचा धोका, लिफ्टचा वापर टाळणे, जिन्यांचा वापर करून बाहेर पडणे, हॉटेल व्यवस्थापनाने अग्निशमन यंत्रणा तत्काळ कार्यान्वित करणे, अग्निशमन विभागाशी त्वरेने संपर्क साधणे याबाबत सविस्तर माहिती दिली. अग्निशमन दलाच्या जवानांनी प्रत्यक्ष प्रात्यक्षिक करून अग्निशामक उपकरणाचा वापर कसा करावा ?, धुरातून सुरक्षितपणे बाहेर कसे पडावे ? तसेच बचाव कार्य करताना कोणती काळजी घ्यावी, हे प्रात्यक्षिकातून दाखवून दिले.