पवनमावळात नवरात्रौत्सवाची तयारी पूर्ण

सोमाटणे, ता. २१ : पवनमावळातील स्वयंभू देवस्थान शेलारवाडी येथील अमरजाईमाता, दारुंब्रे डोंगरावरील वाघजाईमाता व चौराई डोंगरावरील चौराईमाता मंदिरांमध्ये नवरात्रौत्सवाची तयारी पूर्ण झाली आहे. या तिन्ही मंदिरांमध्ये मंडप उभारणी करण्यात आली असून, विद्युत रोषणाई व मंदिराची सजावट करण्यात आली आहे. यानिमित्त विविध धार्मिक कार्यक्रमांचेही नियोजन करण्यात आले आहे.
नवरात्रौत्सवात अमरजाई माता मंदिरात दर्शनासाठी शेकडो भाविक येतात. त्या पार्श्वभूमीवर या वर्षीही नियोजन करण्यात आले आहे. येथे भाविकांसाठी दर्शन व महाप्रसादाची सुविधा करण्यात आली आहे. वाहतूक कोंडी होऊ नये, यासाठी देहूरोड व तळेगाव दाभाडे पोलिसांनी नियोजन केले आहे. दारुंब्रे गावचे जागृत देवस्थान वाघजाईमाता मंदिराच्या सजावाटीचे आज कामे पूर्ण झाली असून उत्सव समितीच्या वतीने विविध धार्मिक कार्यक्रमाचे आयोजन केले आहे. चौराईमाता मंदिराची सजावट रविवारी पूर्ण झाली असून उत्सव समितीच्या वतीने धार्मिक, सांस्कृतिक कार्यक्रमांचेआयोजन करण्यात आले आहे. सोमवारी सकाळी अकरा वाजण्याच्या सुमारास या तीनही देवींच्या मंदिरात विधीपूर्वक आणि परंपरेप्रमाणे घटस्थापना होणार आहे.