लाडक्या बहिणींनो ! आता ई-केवायसी करा...

पिंपरी, ता. २१ ः राज्य महिला व बाल विकास मंत्रालयाने मुख्यमंत्री लाडकी बहीण योजनेच्या सर्व लाभार्थी महिलांना आता ई-केवायसी बंधनकारक केले आहे. दोन महिन्यांच्या आत ही प्रक्रिया करावी लागणार असल्याचे राज्य शासनाकडून सांगण्यात आले आहे. ई-केवायसी प्रक्रिया एकदम सोपी आणि सुटसुटीत असल्याने महिलांना घरबसल्या ई-केवायसी करता येणार आहे.
राज्य सरकारच्या मुख्यमंत्री माझी लाडकी बहीण योजनेत मोठा घोळ झाल्याचे समोर आले होते. तब्बल २६.३४ लाख अपात्र लाभार्थ्यांनी योजनेचा गैरफायदा घेत असल्याचे महिला व बालविकास विभागाच्या तपासणीत निष्पन्न झाले. या अपात्र लाभार्थ्यांचा लाभ जून २०२५ पासून स्थगित करण्यात आला आहे. मात्र, अजूनही काही अपात्र लाभार्थी लाभ घेत असल्याने महिला व बाल विकास मंत्रालयाने या योजनेच्या सर्व लाभार्थी महिलांना आता ई-केवायसी बंधनकारक केले आहे.

ई-केवायसी कशी करावी?
- ladakibahin.maharashtra.gov.in या संकेतस्थळाला भेट द्यावी.
- मुखपृष्ठावर असलेल्या ई-केवायसी बॅनरवर क्लिक केल्यावर ई-केवायसी फॉर्म उघडेल.
- या फॉर्ममध्ये लाभार्थ्याने आपला आधार क्रमांक आणि पडताळणी संकेतांक (कॅप्चा कोड) नमूद करून आधार प्रमाणीकरणासाठी संमती देत ‘सेंड ओटीपी’ या बटणावर क्लिक करावे. त्यानंतर लाभार्थ्याच्या आधार-लिंक मोबाईल क्रमांकावर ‘ओटीपी’ येईल. हा ओटीपी टाकून सबमीट बटणावर क्लिक करावे.
- यानंतर प्रणाली तपासेल की लाभार्थ्याची केवायसी आधीच पूर्ण झाली आहे की नाही.
- जर आधीच पूर्ण झाली असेल, तर ‘ई-केवायसी आधीच पूर्ण झाली आहे’, असा संदेश दिसेल.
- जर पूर्ण झाली नसेल; तर आधार क्रमांक मुख्यमंत्री माझी लाडकी बहीण योजनेच्या पात्र यादीत आहे की नाही हे तपासले जाईल.
- आधार क्रमांक पात्र यादीत असेल; तर पुढील टप्प्याला जाता येईल.
- यानंतर लाभार्थ्याने पती किंवा वडिलांचा आधार क्रमांक तसेच पडताळणी संकेतांक (कॅप्चा कोड) नमूद करावा. संमती दर्शवून सेंड ओटीपीवर क्लिक करावे.
- ओटीपी संबंधित मोबाईलवर प्राप्त झाल्यावर तो टाकून सबमीट बटणावर क्लिक करावा.
- त्यानंतर लाभार्थ्याला आपला जात प्रवर्ग निवडावा लागेल आणि खालील बाबी प्रमाणित जाहीर कराव्या लागतील
- माझ्या कुटुंबातील सदस्य नियमित/कायम कर्मचारी म्हणून शासकीय विभाग / उपक्रम / मंडळ/ केंद्र सरकार किंवा राज्य शासनाच्या स्थानिक संस्थेत कार्यरत नाहीत किंवा सेवानिवृत्तीनंतर निवृत्तीवेतन घेत नाहीत.
- माझ्या कुटुंबातील केवळ एक विवाहित आणि एक अविवाहित महिला या योजनेचा लाभ घेत आहे.
- वरील बाबींची नोंद करून चेक बॉक्सवर क्लिक करावे व सबमीट बटण दाबावे.
- शेवटी, ‘सक्सेस- तुमची ई-केवायसी पडताळणी यशस्वीरित्या पूर्ण झाली आहे’ असा संदेश दिसेल.