एसटी आगारातील गाळे वाटपात दिव्यांगानाही मिळणार प्राधान्य

पिंपरी, ता. २६ ः महाराष्ट्र राज्य मार्ग परिवहन (एसटी) महामंडळाच्या पुणे विभागातील विविध बस स्थानक व आगारातील गाळे वाटपामध्ये दिव्यांगानाही प्राधान्य देणार असल्याचा निर्णय प्रशासनाने घेतला आहे. त्यामुळे दिव्यांग बांधवांना रोजगाराची संधी उपलब्ध होणार आहेत.
एसटी महामंडळाच्या पुणे विभागातील विविध बस स्थानक व आगारातील २१ गाळे वाटपाची जाहिरात प्रसिद्ध केली होती. यामध्ये अनुसूचित जाती, अनुसूचित जमाती, इतर मागासवर्ग, महिला, माजी सैनिकांना प्राधान्य देणार असल्याचे नमूद केले होते. मात्र, यामध्ये दिव्यांगांचा उल्लेख नसल्याने अनेकांनी जाहिरातीवर आक्षेप घेतला होता. याबाबत अपंग कल्याण विभागाच्या आयुक्तांकडे तक्रार केली होती. आयुक्तांनी मंगळवारी (ता. २३) याबाबत सुनावणी घेऊन एसटी महामंडळ प्रशासनाला सूचना दिल्या होत्या. यानंतर एसटी महामंडळ प्रशासनाने शुद्धिपत्र काढून गाळे वाटपामध्ये दिव्यांगांनाही प्राधान्य देणार असल्याचे स्पष्ट केले. गाळे वाटपात दिव्यांगांना प्राधान्य मिळणार असल्याने अनेकांनी आयुक्तांचे आणि एसटी प्रशासनाचे आभार मानले.

गाळे वाटपात कुठेही दिव्यांगांचा उल्लेख नव्हता. याबाबत मी दिव्यांग कल्याण आयुक्त यांच्याकडे तक्रार दाखल केली होती. यावर सुनावणी झाली असून, दिव्यांगांना प्राधान्य देणार असल्याचे एसटीने शुद्धीपत्रक काढले आहे.
- राजेंद्र वाकचौरे, नागरिक