पवनमावळातील तीन धरणे ओव्हरफ्लो; नागरिकांना सतर्कतेचे आवाहन

सोमाटणे, ता. २८ : संततधार पावसामुळे पवनमावळातील मळवंडी, आढले आणि पुसाणे ही तीनही धरणे ओव्हरफ्लो झाली आहेत. नागरिकांनी सतर्क राहावे, असे आवाहन पाटबंधारे विभागाने केले आहे.
शनिवारी रात्रीपासून सुरू झालेल्या संततधार पावसाचा जोर मध्यरात्री आणखी वाढला. यामुळे धरणांच्या सांडव्यातून मोठ्या प्रमाणावर पाणी वाहू लागले आहे. कासारसाई धरण क्षेत्रातही पावसामुळे पाणीपातळी झपाट्याने वाढत असून नियंत्रणासाठी सध्या पाचशे क्युसेक्सप्रमाणे विसर्ग सुरू करण्यात आला आहे.
या विसर्गामुळे आढले आणि कासारसाई नदीला पूर आला आहे. पावसाचा जोर वाढल्यास विसर्ग वाढवला जाणार असल्याने नागरिकांनी नदीपात्रात उतरणे टाळावे, तसेच जनावरे नदीपात्रापासून दूर न्यावे, असे आवाहन कार्यकारी अभियंता डी. एम. दुबल (पुणे पाटबंधारे विभाग) यांनी केले आहे.
दरम्यान, पावसामुळे फुलशेती, फळभाज्या, कडधान्य आदी पिकांचे मोठे नुकसान झाले आहे. नुकसानीची पाहणी करून शेतकऱ्यांना योग्य ती भरपाई मिळावी, अशी मागणी शेतकऱ्यांकडून करण्यात आली आहे.
---