स्वस्त धान्य दुकानांची तपासणी

पिंपरी, ता. २९ : नागरिकांना स्वस्त दरात धान्य उपलब्ध करून देण्यासाठी शिधापत्रिका कार्यालयांतर्गत स्वस्त धान्य दुकानदारांना जबाबदारी देण्यात येते. हे धान्य गुणवत्तापूर्ण आणि योग्य प्रमाणात मिळावे, यासाठी शासनाच्या वतीने नियमित तपासण्या करण्यात येतात. भोसरी शिधापत्रिका कार्यालयांतर्गत सप्‍टेंबरमध्ये १० दुकानांची तपासणी करण्यात आली आहे.
भोसरी शिधापत्रिका कार्यालयांतर्गत स्वस्त धान्य दुकानांची तपासणी मोहीम सप्टेंबर महिन्यात राबविण्यात आली. यात एकूण दहा दुकानांची तपासणी करण्यात आली. यात धान्य साठे, वितरण रजिस्टर, ग्राहकांना दिले जाणारे धान्याचे प्रमाण आणि दुकानांचे कार्यपद्धतीची पाहणी करण्यात आली. तपासणीत कोणत्याही दुकानात अनियमितता आढळून आलेली नाही. त्यामुळे कोणावरही कारवाई करण्यात आलेली नाही, अशी माहिती शिधापत्रिका विभागाकडून देण्यात आली. या तपासण्यांमुळे दुकानदारांवर देखरेख ठेवण्यास मदत होते.

स्वस्त धान्य दुकानांच्या तपासण्या यापुढेही नियमितपणे सुरू राहतील.शासनाकडून दिल्या जाणाऱ्या धान्याच्या गुणवत्ता तसेच उपलब्धतेबाबत नागरिकांमध्ये शंका निर्माण होऊ नये, यासाठी अशा तपासण्या केल्या जातात.
- गजानन देशमुख, परिमंडळ अधिकारी, भोसरी.