जीएसटी कमी झाल्याने विमाधारकांना दिलासा

पिंपरी, ता. १ : विमा पॉलिसीवरील जीएसटी रद्द झाल्याने हप्त्याची रक्कम कमी झाली आहे. त्यामुळे विमाधारकांना १८ टक्के जीएसटी भरावा लागणार नाही.
हा नियम २२ सप्टेंबरपासून लागू झाला आहे. त्यामुळे नव्याने विमा काढणाऱ्यांना दिलासा मिळेल. याशिवाय विम्याचे नूतनीकरण करणाऱ्यांनाही याचा फायदा होईल. त्यामुळे पिंपरी-चिंचवड शहरातील विमाधारकांचा आकडा वाढणार असल्याचे मत अनेक तज्ज्ञांनी व्यक्त केले आहे.
विमा आणि आरोग्य सेवा सर्वसामान्यांच्या आवाक्यात यावी, त्यांना परवडावी यासाठी सरकारने हे मोठे पाऊल उचलले आहे. सरकारने वैयक्तिक विमा, आरोग्यविमा आणि जीवनरक्षक औषधांवर यांच्यावरील जीएसटी पूर्णपणे रद्द केला आहे. ५६ व्या जीएसटी कौन्सिलच्या बैठकीत निर्णय घेण्यात आला.
पंतप्रधानांनी याआधीच जीएसटीमध्ये दिलासा देण्याचे संकेत दिले होते. या निर्णयामुळे कोट्यवधी भारतीय कुटुंबांना थेट आर्थिक दिलासा मिळत आहे.
---
दृष्टिक्षेपात
- १८ टक्के जीएसटी नसल्याने हप्त्याची रक्कम कमी होणार
- एचएसबीसीच्या अहवालानुसार, आरोग्य आणि जीवन विम्याच्या हप्त्याची रक्कम १५ टक्क्यांपर्यंत कमी होऊ शकते
- फॅमिली फ्लोटर घेतल्यास हप्त्याची रक्कम आणखी कमी होणार, त्यामुळे कुटुंबातील सदस्यांना एकत्रित लाभ मिळतो
- ज्येष्ठ नागरिकांना विम्याची जास्त गरज असल्याने त्यांना सर्वाधिक दिलासा
--