पीएमपी मुख्यालयातील २७ जणांची अचानक बदली

सकाळ वृत्तसेवा
पिंपरी, ता. १० ः पुणे महानगर परिवहन महामंडळाच्या (पीएमपीएमएल) स्वारगेट येथील मुख्यालयातून २७ कर्मचारी व कामगारांची तडकाफडकी बदली करण्यात आली. अध्यक्ष व व्यवस्थापकीय संचालक पंकज देवरे यांनी याबाबतचे आदेश बुधवारी (ता. ३०) काढला. एक वरिष्ठ अधिक्षक, पाच सहाय्यक अधिक्षक, १६ वरिष्ठ लिपिक, दोन प्रमुख टेलिफोन अटेंडंट, प्रत्येकी एक टंकलेखक, लघुलेखक, संगणक ऑपरेटर अशा विविध पदांवरील कर्मचाऱ्यांची विविध आगारांत बदली करण्यात आली. आगारांतील ११ कर्मचाऱ्यांची मुख्यालयात बदली करण्यात आली आहे.
प्रशासकीय कामकाज सोईच्यादृष्टीने बदली करण्यात आल्याचे प्रशासनातर्फे सांगण्यात आले आहे, मात्र काही कर्मचारी वर्षानुवर्षे मुख्यालयात ठाण मांडून बसले असल्याने त्यांची बदली करण्यात आल्याची चर्चा पीएमपीएमएल वर्तुळात रंगली आहे. मुख्यालयातील कर्मचाऱ्यांची बदली झालेल्या काही कर्मचाऱ्यांनी बदली थांबवण्यासाठी राजकीय नेत्यांकडे धावाधाव सुरु केली असल्याचीही चर्चा सुरु आहे.
-----