मेट्रोत काम करणाऱ्या नवदुर्गांचा इकॉलॉजी फाउंडेशनतर्फे सत्कार

पिंपरी, ता. ५ ः मेट्रोत स्वच्छता, सुरक्षितता, नियोजन आदी विभागांमध्ये काम करणाऱ्या कर्तृत्ववान महिलांचा इकॉलॉजी फाउंडेशनतर्फे सत्कार करण्यात आला. यावेळी महिलांना आरोग्यविषयक आवश्‍यक भेटवस्तू देण्यात आल्या. फाउंडेशनच्या अध्यक्षा सुजाता कोडग यांनी संस्थेची व कार्यक्रमासंबंधीची भूमिका मांडली. तसेच या नवदुर्गांचे त्या करीत असलेल्या सेवेबद्दल गौरवोद्‍गार काढले व त्यांचे आभार मानले आणि आठ ते दहा तास काम करताना त्यांनी आपल्या आरोग्याची काळजी घ्यावी असा सल्लाही दिला. फाउंडेशनचे सदस्य संजय शितोळे यांच्याकडून पर्यावरणाची व वैयक्तिक काळजी घेण्यासाठी सुरक्षा कर्मचारी आणि इतर साफसफाई कर्मचारी यांना चहाचे स्टीलचे कप देण्यात आले. सध्या चहा पिण्यासाठी वापरत असलेले कागदी कप हे एकल वापराचे, आरोग्यास व पर्यावरणास हानिकारक असल्यामुळे त्याचा वापर न करता स्टीलच्या कपाचा वापर करावा, असे आवाहन त्यांनी केले. याप्रसंगी इकॉलॉजी परिवाराचे सदस्य सतीश कोडग, संचिता व शुभम साळुंके उपस्थित होते. कार्यक्रम यशस्वितेसाठी मेट्रो परिवारातर्फे शुभम दळवी यांनी विशेष प्रयत्न केले.
---