‘परिश्रम, जिद्द, बुद्धिमत्ता ही यशाची त्रिसूत्री’

पिंपरी, ता. २ ः ‘‘प्रशासकीय सेवा ही लोकसेवा आहे, हे प्रथम लक्षात ठेवा. जीवनात यशस्वी व्हायचे असेल; तर परिश्रम, जिद्द, बुद्धिमत्ता ही त्रिसूत्री महत्त्वाची आहे. स्पर्धा परीक्षांसाठी केवळ पुस्तकी अभ्यास पुरेसा नाही; तर आजूबाजूचे निरीक्षण तेवढेच महत्त्वाचे आहे,’’ असे प्रतिपादन स्वामी स्वरूप स्वानंद यांनी केले.
भारतरत्न सरदार वल्लभभाई पटेल यांच्या १५० व्या जयंतीनिमित्त सोहम् सार्वजनिक ग्रंथालयाच्यावतीने पिंपरीतील संत तुकारामनगर येथे दिवाळी अंक आणि अन्य ग्रंथांचे भव्य प्रदर्शन आयोजित करण्यात आले. त्यावेळी स्वामी स्वरूप स्वानंद बोलत होते. यावेळी लेखक - निवेदक श्रीकांत चौगुले, माणिक महाले, सुप्रिया डोळे, शुभांगी पाटील, स्मिता व्यवहारे, दिलीप ससाणे, नीलेश महाले, निर्मला नेरकर प्रमुख उपस्थित होते.
स्वामी स्वरुप स्वानंद यांनी आपली ग्रंथसंपदा ग्रंथालयाला भेट देऊन स्पर्धा परीक्षांच्या विद्यार्थ्यांना मार्गदर्शन केले. सोहम् सार्वजनिक ग्रंथालय आणि अभ्यासिकेचे अध्यक्ष जगन्नाथ नेरकर यांनी प्रास्ताविक केले. प्रदीप बोरसे यांनी सूत्रसंचालन केले. ग्रंथपाल वर्षा बोरसे यांनी आभार मानले.