देहूरोडला एकता दौड

पिंपरी, ता. २ ः सरदार वल्लभभाई पटेल यांच्या जयंतीनिमित्त देहूरोड पोलिस ठाण्याच्यावतीने पोलिस उपायुक्त कार्यालय, विकासनगर ते देहूरोड पोलिस ठाण्यापर्यंत तीन किलोमीटरची एकता दौड आयोजित करण्यात आली. त्यामध्ये सर्व स्तरांतील नागरिकांनी सहभाग घेतला. पोलिस उपायुक्त बाळासाहेब कोपनर यांनी धावपटूंना एकतेची शपथ देऊन दौड सुरू झाली. रस्त्यात सर्व नागरिकांनी दौडचे उत्स्फूर्त स्वागत केले. ठिकठिकाणी पाणी, औषध आणि अल्पोपहाराची व्यवस्था करण्यात आली. प्रत्येक गटांमधील पहिल्या तीन स्पर्धकांना बक्षिसे देण्यात आली. ज्येष्ठ नागरिकांमध्ये विजेते डी. एन. धोत्रे, उपविजेते पंढरीनाथ सानप यांना सन्मानित करण्यात आले. वरिष्ठ पोलिस निरीक्षक विक्रम बनसोडे यांनी स्वागत केले. रवींद्र कदम यांनी एकतेचे महत्व विशद केले.