यमुनानगर परिसरात बेवारस कुत्र्यांचा धुमाकूळ

पिंपरी, ता. ६ ः निगडी यमुनानगर परिसरात बेवारस कुत्र्यांनी धुमाकूळ घातला आहे. त्यामुळे नागरिकांच्या जीवितास धोका निर्माण झाला आहे. मोटर सायकलींच्या पाठलाग करून वाहन धारकाला चावा घेतल्याचेही प्रकार घडले आहेत. त्यामुळे या मोकाट कुत्र्यांचा बंदोबस्त करावा अशी मागणी नागरिकांकडून होत आहे. 
शहरात अनेक ठिकाणी मोकाट कुत्र्यांचे टोळके वावरत आहेत. दिवसाढवळ्या नागरिकांवर हल्ले, शाळेत जाणाऱ्या विद्यार्थ्यांवर हल्ले, ज्येष्ठ नागरिकांच्या वॉकला अडथळे यांसारख्या समस्या निर्माण होत आहे. पालिका प्रशासनाने भटक्या कुत्र्यांना पकडण्याची मोहीम राबवावी, अशी मागणी नागरिकांकडून होत आहे.

अनेक वर्षांपासून या संदर्भात तक्रारी होत असूनही कोणतेही ठोस धोरण आखले गेलेले नाही. कुत्र्यांच्या उपद्रवामुळे नागरिकांचा त्रास वाढत आहे. पालिकेचे अधिकारी मात्र कारवाईकडे दुर्लक्ष करीत आहेत.
-दत्तात्रेय गुंजाळ, निगडी

यमुनानगर परिसरात कुत्र्यांची वाढती भीती कमी करण्यासाठी त्यांना पकडण्याची मोहीम राबवावी, शिवाय त्यांची उत्पत्ती रोखण्यासाठी महापालिकेकडून कुत्र्यांचे निर्बिजीकरण सारखी उपाययोजना करावी.
- सतीश काकडे, यमुनानगर