‘त्या’ पोलिस निरीक्षकाची खातेनिहाय चौकशी

पिंपरी, ता. ६ : लाचप्रकरणात नाव आलेल्या वरिष्ठ पोलिस निरीक्षकाची खातेनिहाय चौकशी करण्याचे आदेश देण्यात आले आहेत. संदीप सावंत असे या वरिष्ठ निरीक्षकाचे नाव आहे. तर प्रमोद चिंतामणी असे निलंबित केलेल्या या प्रकरणातील लाच प्रकरणातील लाचखोर पोलिस उपनिरीक्षकाचे नाव आहे.
पिंपरी चिंचवड पोलिसांच्या आर्थिक गुन्हे शाखेकडे फसवणुकीचा एक गुन्हा तपासासाठी आहे. याचा तपास उपनिरीक्षक प्रमोद चिंतामणी याच्याकडे होता. वकिलाच्या अशिलाला मदत करण्यासाठी तसेच जामीन अर्जावर स्टे दाखल करण्यासाठी प्रमोद चिंतामणीने दोन लाखांची लाच मागितली होती. मात्र, नंतर चिंतामणीने २ कोटी देण्याचा तगादा लावला. एक कोटी आर्थिक गुन्हे शाखेतील वरिष्ठ निरीक्षकाला तर १ कोटी स्वत:साठी मागितल्याचे समोर आले. तक्रारदारांनी लाचलुचपत प्रतिबंधक विभागाकडे तक्रार दिली. त्यानुसार पथकाने प्रमोद याला ४६ लाख ५० हजारांची लाच घेताना पकडले. या कारवाईनंतर पिंपरी चिंचवड पोलिस आयुक्त विनयकुमार चौबे यांनी प्रमोद चिंतामणी याला सेवेतून निलंबित केले, तरसंदीप सावंत यांना नियंत्रण कक्षाशी संलग्न केले. आता सावंत यांच्या खातेनिहाय चौकशीचे आदेश दिले आहेत.