पंधरापेक्षा अधिक भूखंडांची लिलाव प्रक्रिया जाहीर

पिंपरी, ता. ७ : पुणे महानगर प्रदेश विकास प्राधिकरणाच्या (पीएमआरडीए) जमीन व मालमत्ता विभागामार्फत भूखंडांचा लिलाव जाहीर करण्यात आला आहे. यात भोसरी, चिखली, रहाटणी, रावेत, मोशीतील पंधरापेक्षा अधिक भूखंडांचा समावेश आहे. शैक्षणिक, व्यावसायिक, वैद्यकीय आणि सार्वजनिक सुविधांसाठी हे भूखंड राखीव आहेत.
या प्रक्रियेची माहिती जमीन व मालमत्‍ता विभागाचे सहआयुक्‍त हिम्‍मत खराडे यांनी दिली. ८० वर्षांच्‍या कालावधीसाठी भाडेपट्ट्याने या भूखंडांचे वाटप केले जाणार आहे. भोसरी परिसरात प्राथमिक, माध्यमिक शाळा तसेच हॉस्पिटलसाठी सेक्‍टर एक आणि १२ या ठिकाणी भूखंड उपलब्ध आहेत. सेक्‍टर दहा येथे व्‍यावसायिक गाळे, सेक्‍टर तीन येथे सार्वजनिक सुविधांसाठी, सेक्‍टर दोन येथे वाचनालय आणि संगीत विद्यालयासाठी राखीव ठेवण्यात आले आहेत. भोसरीतील सेक्‍टर सात येथे फॅसिलिटी सेंटर उभारण्यात येणार आहे. ११ हजार ८७ स्‍क्‍वेअर मीटर जागा उपलब्ध असणार आहे. व्यावसायिक हेतूसाठी चिखली, रहाटणी, रावेत परिसरातील भूखंडांचा समावेश आहे. चिखलीत सेक्‍टर २०, रहाटणीतील सेक्‍टर ३८, रावेत येथील सेक्‍टर २९, बोऱ्हाडेवाडीतील सेक्‍टर ११ आणि चार येथे भूखंड उपलब्ध आहे.
संबंधित सर्व भूखंडांच्‍या ई-लिलावासाठी इच्छुकांनी https://eauction.gov.in या संकेतस्थळावर ७ ते २७ नोव्‍हेंबर २०२५ रोजी सकाळी ११ ते सायंकाळी ५ वाजेपर्यंत आवश्यक कागदपत्रे अपलोड करावीत. यात तांत्रिकदृष्ट्या पात्र ठरलेल्‍यांची घोषणा ९ डिसेंबरला होईल. १० डिसेंबरला ई-लिलावाची प्रक्रिया संकेस्‍थळावर सुरू होणार आहे. या प्रक्रियेची अधिक माहिती https://eauction.gov.in आणि https://pmrda.gov.in या संकेस्‍थळांवर उपलब्ध करण्यात आली आहे, अशी माहिती खराडे यांनी दिली.
---