आळंदी यात्रेसाठी एसटीच्या जादा गाड्या

सकाळ वृत्तसेवा
पिंपरी, ता. ८ ः कार्तिकी एकादशी (आळंदी यात्रा) तसेच संतश्रेष्ठ श्री ज्ञानेश्वर महाराज यांच्या संजीवन समाधी सोहळ्यानिमित्त भाविकांच्या सोईसाठी महाराष्ट्र राज्य मार्ग परिवहन महामंडळ (एसटी) ३२० जादा गाड्या सोडणार आहे. १२ ते १८ नोव्हेंबर दरम्यान स्वारगेट, देहूगावासह पुणे जिल्ह्यातील विविध आगारांमधून या गाड्या सोडण्याची व्यवस्था करण्यात आली आहे.
आळंदी यात्रा चार दिवसांवर आली आहे. या यात्रेनिमित्त राज्यभरातील लाखो भाविक आळंदीत दाखल होतात. आळंदीतील एसटीच्या मोकळ्या जागेवर साफसफाई सुरु करण्यात आली आहे. यात्रा काळात जादा गाड्या सोडण्यासाठी या जागेवर शेड, क्यू रेलिंग, ध्वनीवर्धक यंत्रणा बसविणे ही काम सुरु झाली आहेत. राज्यातून थेट आळंदीपर्यंत येणाऱ्या गाड्यांची संख्या कमी आहे. त्यामुळे अनेक भाविक पिंपरी चिंचवड, शिवाजीनगर, स्वारगेट, जुन्नर आणि पुणे स्टेशन आदी आगारांमध्ये उतरतात. तेथून पुढे आळंदीपर्यंतचा त्यांचा प्रवास सुकर व्हावा यादृष्टीने एसटी महामंडळाच्या पुणे विभागाने नियोजन केले आहे.
या विभागातील पिंपरी चिंचवड, शिवाजीनगर, स्वारगेट, भोर, नारायणगाव, राजगुरुनगर, तळेगाव, शिरूर, बारामती, इंदापूर, सासवड, दौंड, बारामती आणि मंचर या आगारांच्या १८० आणि सातारा, कोल्हापूर, सांगली आणि सोलापूर या आगारांच्या १४० अशा एकूण ३२० गाड्या सोडण्यात येतील. जादा गाड्या स्वारगेट, शिवाजीनगर, चाकण, जुन्नर, शिक्रापूर, देहूगाव आणि पुणे स्टेशनवरून सुटतील, अशी माहिती आवाहन विभाग नियंत्रक अरुण सिया यांनी दिली.
-------------
तपशील
मार्ग - तिकीट दर - साधी पूर्ण - अर्धे - निमआराम पूर्ण - अर्धे
स्वारगेट ते आळंदी - ४६ - २४ - ६२ - ३२
शिवाजीनगर ते आळंदी - ३६ - १९ - ४९ - २५
जुन्‍नर ते आळंदी - १३२ - ६६ - १७८ - ९०
चाकण ते आळंदी - २६ - १४ - ३५ - १८
शिक्रापूर ते आळंदी - ५१ - २६ - ६९ - ३५
देहूगाव ते आळंदी - ४१ - २१ - ५६ - २८
पुणे स्टेशन ते आळंदी - ३६ - १९ - ४९ - २५
----------