इंद्रायणी साहित्य संमेलन २३ नोव्हेंबरला

पिंपरी,ता. ९ ः ‘‘इंद्रायणी साहित्य परिषदेच्यावतीने मोशी येथे २३ नोव्हेंबरला चौथे इंद्रायणी साहित्य संमेलन आयोजित करण्यात आले आहे. अ.भा.मराठी साहित्य संमेलनाचे अध्यक्ष विश्वास पाटील यांना यशवंतराव चव्हाण प्रज्ञावंत साहित्य पुरस्काराने गौरविण्यात येईल’’, अशी माहिती परिषदेचे अध्यक्ष संदीप तापकीर यांनी पत्रकार परिषदेत दिली.
यावेळी ज्येष्ठ साहित्यिक अरुण बोऱ्हाडे, रामभाऊ सासवडे, सोपान खुडे, डॉ. पौर्णिमा कोल्हे आदी उपस्थित होते.
तापकीर म्हणाले,‘‘मोशीतील जय गणेश बॅक्वेट येथे हे संमेलन होणार आहे. त्याचे उद्‍घाटन ज्येष्ठ साहित्यिक व शिक्षण तज्ज्ञ न. म. जोशी यांच्या हस्ते होणार आहे. संमेलनाच्या अध्यक्षपदी डॉ. सीमा काळभोर यांची; तर स्वागताध्यक्षपदी नीलेश बोराटे यांची निवड करण्यात आली आहे. उद्‍घाटनाच्या दिवशी सकाळी ८ वाजता मोशीचे ग्रामदैवत श्री नागेश्वर महाराज मंदिर येथून संमेलनस्थळापर्यंत ग्रंथदिंडी काढण्यात येईल. यावेळी प्रमुख मान्यवरांच्या हस्ते पुण्यश्लोक अहिल्याबाई होळकर जीवन चरित्र प्रदर्शनाचे उद्‍घाटन होईल. त्यानंतर आजची युवा पिढी आणि साहित्य प्रवाह हे चर्चासत्र होईल. त्यानंतर मकरंद टिल्लू यांचा एकपात्री विनोदी कार्यक्रम होईल. संमेलनाध्यक्षा डॉ. सीमा काळभोर यांची दुपारी २ वाजता प्रकट मुलाखत होईल. शेवटच्या सत्रात ‘पुण्यश्लोक अहिल्याबाई होळकर यांचे सांस्कृतिक योगदान’ या विषयावर परिसंवाद होणार आहे. अहिल्याबाई होळकर यांचे वंशज भूषणराजे होळकर हे त्याच्या अध्यक्षस्थानी राहणार आहेत.
बोऱ्हाडे म्हणाले,‘‘समारोप सत्रामध्ये विराज लांडगे (कबड्डी), प्रा. डॉ. अमित तापकीर (शैक्षणिक), सुचेता घिगे (प्रशासन), मानसी मोकाशी (आर्किटेक्ट), ॲड. सतीश गोरडे (विधी सेवा), स्मिता बोराडे (व्यक्तिमत्व विकास), विजय चव्हाण (लेखक), गोरक्षनाथ महाराज उदागे (समाज प्रबोधन) व डॉ. बी. एन. चव्हाण (शैक्षणिक) यांना भूमिपुत्र पुरस्कार देऊन गौरविण्यात येणार आहे. सायंकाळी ‘गजर मुशायर’ हा कार्यक्रम होईल.’’