अलंकापुरीत वैष्णवांचा महासागर

कार्तिक एकादशीनिमित्त राज्यभरातून लाखो भाविक आळंदीत दाखल झाले होते. शनिवारी (ता. १५) इंद्रायणी नदीकाठ गर्दीने फुलून गेला होता. पहाटेपासूनच इंद्रायणीच्या तीरावर बोचऱ्या थंडीत वारकऱ्यांनी तीर्थस्नान केले. अनेक दिंड्या नदीवर आल्याने वारकरी महिला व पुरुष पाण्यात आपल्या भगव्या पताका भिजवून इंद्रायणी नदीस नमस्कार करून फुगड्या खेळताना दिसले. टाळ-मृदंगाच्या निनादात तसेच ‘ज्ञानोबा-माउली-तुकाराम’च्या जयघोषात परिसर भारावून गेला होता. गर्दीत भगव्या पताका सर्वांचे लक्ष वेधत होते. अनेक महिला वारकरी डोक्यावर तुळशी वृंदावन, विठ्ठल-रुक्मिणी, माउलींची मूर्ती घेऊन नदीकाठी टाळ्या वाजवत होते. लहान मुले कपाळी गंध व टिळा लावून फिरताना दिसत होते. संपूर्ण अलंकापुरी आनंदी व भक्तिमय वातावरणात गर्दीने फुलून गेली होती. (रितेश छपरीबंद : सकाळ छायाचित्रसेवा)