घरकुल परिसरात कर्णकर्कश भोंग्यामुळे नागरिक त्रस्त

पिंपरी, ता. १५ ः चिखली येथील घरकुल परिसरात रहिवासी सोसायट्यांमध्ये सकाळी व सायंकाळी फेरीवाले भोंग्याचा वापर करून वस्तू विकतात. या कर्णकर्कश भोंग्यामुळे नागरिकांच्या आरोग्यास धोका निर्माण झाला आहे.
जवळपास पंचवीस हजार लोकसंख्या असलेला हा घरकुल परिसर आहे. रस्त्यालगत घरे असल्याने दिवसभरात दिडशे ते दोनशे फेरीवाले, विक्रेते सतत फिरत असतात. अनेक सोसायट्यांमध्ये सुरक्षा रक्षक नाहीत. त्यामुळे फेरीवाले थेट इमारतीच्या पार्किंग मध्ये भोंग्याचा आवाज वाढवितात. याचा लहान मुले, आजारी नागरिक, आयटी कर्मचारी, ज्येष्ठ नागरिक आदींना त्रास होतो. भोंगेवाल्यांना आवाज कमी करण्यासाठी सांगितले तर उद्धटपणे बोलून अंगावर धावून येतात, असे नागरिकांनी सांगितले.

महापालिकेच्या ‘सारथी’ या संकेतस्थळावर नागरिकांनी तक्रारी केल्या आहेत. पोलिसांनाही माहिती दिली आहे. मात्र कारवाई होत नाही. महापालिकेने अशा विक्रेत्यांवर कारवाई करण्यासाठी विशेष भरारी पथक नेमावेत.
-विनायकराव लाटे, स्थानिक नागरिक