‘वंदे मातरम्’ने राष्ट्रभावना प्रज्वलित केली ः देशपांडे

पिंपरी, ता. १६ ः ‘बंकिमचंद्र चटोपाध्याय हे भारतीय राष्ट्रीय विचारप्रवाहाचे मूळ प्रेरणास्थान आहेत. ‘वंदे मातरम्’ या गीताने त्यांनी भारतीयांच्या मनात राष्ट्रप्रेमाची तेजस्वी ज्योत प्रज्वलित केली,’ असे प्रतिपादन ज्येष्ठ अभ्यासक नारायण देशपांडे यांनी केले.
वंदे मातरम् या गीताला १५० वर्षे पूर्ण झाल्याच्या यानिमित्ताने स्वातंत्र्यवीर सावरकर मंडळातर्फे आयोजित ‘वंदे मातरम् - राष्ट्रचेतना स्तोत्र’ या विषयावर देशपांडे यांनी व्याख्यान दिले. निगडी प्राधिकरणातील स्वातंत्र्यवीर सावरकर सभागृहात हा कार्यक्रम झाला. बंकिमचंद्र यांनी जीवनातील अपमानाच्या खोल अनुभवातून आणि मातृभूमीच्या भावदर्शनातून ‘वंदे मातरम्’ची निर्मिती कशी केली, याची सांगोपांग मांडणी देशपांडे केली. ‘आनंदमठ’ कादंबरीतून बंकिमचंद्र यांनी स्वातंत्र्यलढ्याला नवचैतन्य देणारी सूचक दिशा दिली, असेही त्यांनी नमूद केले.
यावेळी ज्ञानप्रबोधिनी नवनगर विद्यालयाचे शिक्षण विभागप्रमुख शिवराज पिंपुडे, मंडळाचे अध्यक्ष विजय कर्ता, कार्याध्यक्ष रमेश बनगोंडे, सचिव ॲड. हर्षदा पोरे आदी उपस्थित होते. अनुष्का सामंत आणि श्रेया आगरवाल यांच्या ‘वंदे मातरम्’वरील शास्त्रीय नृत्याने कार्यक्रमाचा प्रारंभ झाला. याप्रसंगी फुलांच्या पाकळ्यांच्या रांगोळीत ‘वंदे मातरम्’ रेखाटून प्रज्वलित दीपांनी सजावट केली होती.
समृद्धी पैठणकर यांनी सूत्रसंचालन केले. शैलेश भिडे आणि क्षिप्रा पटवर्धन यांनी प्रमुख पाहुण्यांचा परिचय करून दिला. ॲड. हर्षदा पोरे यांनी प्रास्ताविक केले. कोषाध्यक्ष विकास देशपांडे यांनी आभार मानले. कार्यक्रमाची सांगता एस. पी. एम. इंग्लिश मीडियम स्कूलच्या विद्यार्थ्यांच्या सांगीतिक ‘वंदे मातरम्’ने झाली.
---