भरधाव खासगी बसच्या धडकेत दाम्पत्य जखमी

पिंपरी : भरधाव खासगी बसने दिलेल्या धडकेत मोटारीतील दाम्पत्य जखमी झाले. ही घटना पुणे-नाशिक महामार्गावर भोसरीतील लांडेवाडी येथे घडली. याप्रकरणी रामचंद्र बापू शिंदे (रा. गणेशनगर, बोपखेल) यांनी भोसरी पोलिस ठाण्यात फिर्याद दिली आहे. त्यानुसार व्यंकटेश सायलु कोरोमणी (वय ६०, रा. पीएमसी कॉलनी, घोरपडी पेठ, पुणे) या बस चालकावर गुन्हा दाखल झाला आहे. फिर्यादी आणि त्यांची पत्नी हे त्यांच्या मोटारीने घरी जात होते. त्यावेळी आरोपीने त्याच्या ताब्यातील भरधाव बसने फिर्यादीच्या मोटारीला मागून धडक दिली. यामध्ये फिर्यादी आणि त्यांच्या पत्नीला दुखापत झाली तसेच त्यांच्या मोटारीचे नुकसान झाले.

पोलिस अंमलदाराला जिवे मारण्याची धमकी
पिंपरी : वाहनावर होणारी दंडात्मक कारवाई टाळण्यासाठी एका वाहन चालकाने पोलिस अंमलदाराला दगडाने मारहाण करून शिवीगाळ करीत जिवे मारण्याची धमकी दिली. ही घटना दिघी पोलिस ठाण्याच्या हद्दीतील देहू फाटा येथे घडली. याप्रकरणी पोलिस अंमलदार कल्याण भोसले यांनी दिघी पोलिस ठाण्यात फिर्याद दिली आहे. त्यानुसार पोलिसांनी इस्माईल सैफान भागानगरे (वय २३, रा. मोहननगर, भोसरी) याला अटक केली आहे. पोलिस अंमलदार कल्याण भोसले हे दिघी-आळंदी वाहतूक विभागात कार्यरत असून, ते आळंदी येथील देहू फाटा येथे कर्तव्य बजावत होते. दरम्यान, वाहतूक नियमांचे उल्लंघन करणाऱ्या वाहनांवर कारवाई करीत असताना आरोपीने वाहनावर होणारी दंडात्मक कारवाई टाळण्यासाठी फिर्यादी भोसले यांना शिवीगाळ करीत दगड फेकून मारहाण केली. यात भोसले यांच्या डोक्याला आणि उजव्या हाताला दुखापत झाली. तसेच, आरोपीने भोसले यांना जिवे मारण्याची धमकी देत शासकीय कामात अडथळा आणला.

गॅस रिफिलिंगप्रकरणी एकावर गुन्हा दाखल
पिंपरी : घरामध्ये बेकायदारित्या एका गॅस सिलिंडरमधून दुसऱ्या सिलिंडरमध्ये गॅस रिफिलिंग करणाऱ्या एका व्यक्तीवर गुन्हा दाखल करण्यात आला. ही कारवाई भोसरीतील खंडेवस्ती येथे गुन्हे शाखा युनिट एकच्या पथकाने केली. सुगन स्वरुपराम चौधरी (वय ३२, रा. खंडेवस्ती, भोसरी) असे गुन्हा दाखल झालेल्या व्यक्तीचे नाव आहे. आरोपी चौधरी याने नागरिकांच्या जीविताला धोका निर्माण होईल हे माहीत असूनही कोणतीही सुरक्षिततेची काळजी न घेता एका गॅस सिलिंडरमधील गॅस दुसऱ्या सिलिंडरमध्ये बेकायदारित्या भरला. यावेळी पोलिसांनी कारवाई करून आरोपीकडून १७ हजार १६० रुपये किमतीचा मुद्देमाल जप्त केला.
---