दोन वाळक्या झाडांमुळे साने चौकात अपघाताचा धोका

चिखली, ता.१२ : साने चौक येथील जीएमसी पॅलेस इमारतीसमोरील दोन झाडे वाळली असून ती अंगावर पडून अपघात होण्याचा धोका संभवत आहे. अपघात होण्यापूर्वीच वाळलेली झाडे हटवावीत, अशी मागणी व्यापाऱ्यांकडून केली जात आहे.
चिखलीतील साने चौक हा परिसर अतिशय वर्दळीचा आहे. या चौकामध्येच रस्त्याच्या कडेला लावण्यात आलेल्या दोन्ही झाडांचे लाकूड कुजले आहे. या झाडाच्या बाजूलाच अनेक नागरिक आपली वाहने उभी करतात. त्याचबरोबर लगतच्या पदपथावरून मोठ्या प्रमाणात नागरिकांची ये-जा सुरू असते. याबाबत महापालिकेच्या उद्यान विभागाला वारंवार कळवूनही झाडे काढून घेण्याची तसदी घेतली गेलेली नाही. काही वर्षांपूर्वी याच रस्त्यावरील फुलेनगर परिसरात वाळलेल्या झाडाची फांदी अंगावर पडून एका व्यक्तीचा मृत्यू झाला होता. सध्या वादळवारे आणि पावसाचे दिवस आहेत. जोरदार वाऱ्याने झाड कोसळून एखाद्या व्यक्तीच्या अंगावर पडल्यास अपघात होण्याची शक्यता आहे.
जीएमसी पॅलेस सोसायटीचे अध्यक्ष नेताजी काशीद म्हणाले,‘‘झाडे काढून घेण्याबाबत उद्यान विभागाच्या अधिकाऱ्यांना वारंवार कळविण्यात आले आहे. मात्र, गेल्या महिन्याभरापासून वाळलेली झाडे काढून घेण्यासाठी येतो असे सांगत आहेत. मात्र, त्यांना अद्याप झाडे काढून घेण्याचा मुहूर्त मिळालेला नाही.’’