राष्ट्रीय निवृत्तिवेतन योजनेअंतर्गत प्रशिक्षण

पिंपरी, ता. १२ ः महापालिका सेवेत एक नोव्हेंबर २००५ नंतर रुजू झालेल्या कर्मचाऱ्यांना निवृत्तिवेतन (पेन्शन) योजना आता लागू झाली आहे. त्यांचा राष्ट्रीय निवृत्तिवेतन योजनेमध्ये (एनपीएस) समावेश केला आहे. त्याअनुषंगाने संबंधित अधिकाऱ्यांना महापालिका लेखा विभागांतर्गत प्रोटीन (एनएसडीएल) कंपनीने प्रशिक्षण दिले.
पिंपरीतील ज्ञानज्योती सावित्रीबाई फुले स्मारक सभागृहात अधिकाऱ्यांना प्राथमिक प्रशिक्षण दिले. नगरसचिव मुकेश कोळप, मुख्य उद्यान अधीक्षक महेश गारगोटे, उपमुख्य लेखा व वित्त अधिकारी अरुण सुपे, ज्येष्ठ वैद्यकीय अधिकारी डॉ. तृप्ती सागळे, डॉ. ऋतुजा लोखंडे, डॉ. सय्यद अलवी, मुख्य कामगार कल्याण अधिकारी प्रमोद जगताप, औद्योगिक प्रशिक्षण संस्थेचे प्राचार्य शशिकांत पाटील, माहिती-तंत्रज्ञान अधिकारी उज्वला गोडसे, कार्यकारी अभियंता महेश कावळे, लेखाधिकारी दीपक गायकवाड, प्रशासन अधिकारी राजीव घुले, डी. डी. कांबळे, राजाराम सरगर, रवींद्र बोऱ्हाडे, उपलेखापाल सागर नेवाळे आदी उपस्थित होते.
प्रोटीनचे सहाय्यक व्यवस्थापक सूर्यकांत तरे यांनी, पात्र अधिकारी, कर्मचाऱ्यांची सभासद म्हणून नोंदणी करण्यात येणार असल्याचे सांगितले. त्यासाठी कर्मचाऱ्यांकडून अर्ज भरून घेतले जात असून, त्यांना वैयक्तिक कायमस्वरूपी सेवानिवृत्त खाते क्रमांक (जीआरएएन ः पर्मनंट रिटायरमेंट अकाउंट नंबर) देण्यात येत आहेत. प्रास्ताविक अरुण सुपे यांनी केले. सूत्रसंचालन जनता संपर्क अधिकारी प्रफुल्ल पुराणिक यांनी केले.

विविध विभाग प्रमुखांच्या नियंत्रणाखाली कामकाज करणाऱ्या अधिकाऱ्यांना प्रत्यक्ष काम करण्याचे प्राथमिक प्रशिक्षण देण्यात आले. यापुढे विभागातील संबंधित इतरही कर्मचाऱ्यांसमवेत सूक्ष्म पातळीवर पुन्हा प्रशिक्षण देण्यात येणार आहे.
- प्रवीण जैन, मुख्य लेखा व वित्त अधिकारी, महापालिका