तळवडे-चिखली शिवरस्ता होण्याचा मार्ग सुकर

पिंपरी, ता. १२ : तळवडे, चिखलीसह रेडझोन भागातील रस्त्याच्या भूसंपादनासाठी शंभर टक्के नुकसान भरपाई व टीडीआर देण्यासाठी उपमुख्यमंत्री अजित पवार यांनी जाहीर कार्यक्रमात कबुली दिली. राज्य सरकारकडून मिळणारा हिरवा कंदील यामुळे रेडझोन भागातील शेतकऱ्यांना दिलासा मिळणार आहे. माजी नगरसेवक पंकज भालेकर यांनी त्‍यासाठी पाठपुरावा केला आहे.
हिंजवडी आयटी पार्क, चाकण औद्योगिक वसाहत पाठोपाठ तळवडे आयटी पार्कमधील वाहतूक कोंडी कमी करण्यासाठी राज्य सरकार प्रयत्न करत आहे. चाकण औद्योगिक वसाहतीकडून येणाऱ्या वाहतुकीमुळे तळवडे परिसरात वाहतूक कोंडीचा सामना करावा लागतो. देहू अम्युनिशन डेपोच्या दोन हजार यार्डच्या परिघात येत असल्याने येथे कोणतेही बांधकाम करता येत नाहीत. तळवडे येथे रस्त्यांसाठी भूसंपादन मोबदला (टीडीआर) ५० टक्के मिळतो. त्यामुळे परिसरातील शेतकरी रस्ता विकसित करण्यास जागा देत नाहीत. त्यामुळे अनेक वर्षांपासून या भागातील रस्ते विकसित झाले नाहीत. शहरातील इतर भागात रस्त्यासाठी मिळणारा मोबदला व टीडीआर तळवडे रेडझोन हद्दीतील शेतकऱ्यांना शंभर टक्के मिळावा यासाठी अजित गव्हाणे व नगरसेवक पंकज भालेकर यांनी केलेल्या मागणीवर उपमुख्यमंत्री तथा पालकमंत्री अजित पवार यांनी प्रश्न मार्गी काढण्यासाठी पुढाकार घेतला आहे.
तळवडे निगडी रस्त्याला पर्यायी मार्ग म्हणून तळवडे चिखली शिवरस्ता मार्गी लागणार आहे. तळवडे चिखलीसह शहरातील रेडझोन हद्दीत असणाऱ्या अनेक रस्ते विकसित होण्यासाठी याचा उपयोग होणार आहे. बाधित शेतकऱ्यांना शंभर टक्के मोबदला मिळाला तर यापुढे प्रभागात असणारी रस्त्याची आरक्षण व इतर आरक्षण विकसित होण्यास मदत होणार आहे, अशी माहिती भालेकर यांनी दिली.