‘अंगारकी’निमित्त मोरया...चा गजर

पिंपरी, ता.१२ : पहाटेपासूनच दर्शनासाठी लागलेल्या रांगा...‘मोरया, मोरया’चा गजर, मंत्रोच्चारात पूजा व अभिषेक, भाविकांनी फुलून गेलेला मोरया गोसावी समाधी मंदिर व मंगलमूर्ती वाड्याचा परिसर असे वातावरण चिंचवड येथील मोरया गोसावी मंदिराच्या परिसरात मंगळवारी पाहायला मिळाले.
वर्षातून एकदा किंवा दोनदा येणाऱ्या अंगारकी चतुर्थीनिमित्त गणेशाचे दर्शन घेण्यासाठी गणेशभक्तांनी पहाटेपासूनच रांगा लावल्या होत्या. अनेक गणेशभक्तांनी सहकुटुंब श्रींचे दर्शन घेतले. यामध्ये महिला व तरुणांचीही संख्या मोठी होती. गर्दी लक्षात घेऊन चिंचवड देवस्थान ट्रस्टतर्फे विशेष नियोजन करण्यात आले होते.
मोरया गोसावी समाधी मंदिरात पहाटे महापूजा करण्यात आली. त्यानंतर मंदिर भाविकांसाठी खुले करण्यात आले. पहाटेपासूनच भाविकांनी रांगा लावून दर्शन घेतले. दिवस पुढे सरकला, तसतशी मंदिरातील गर्दी वाढत गेली. दर्शनबारीवर मंडप टाकून सावलीचीही सोय करण्यात आली होती. दुपारी १२ वाजता समाधी मंदिरात पूजा पार पडली. तर रात्री आरती करण्यात आली. चंद्रोदयानंतरही रात्री उशिरापर्यंत भाविकांनी गणेशाचे दर्शन घेतले. दिवसभर भाविकांची वर्दळ, मंदिर परिसरात थाटण्यात आलेली दुकाने यामुळे या परिसराला जत्रेचे स्वरूप आले होते.

सहस्रावर्तन अन् रक्तदान शिबिर
मंगलमूर्ती वाड्यातही भाविकांनी मोरया गोसावीप्राप्त गणेशाचे दर्शन घेण्यासाठी गर्दी केली. सकाळी मंगलमूर्ती वाड्यामध्ये सहस्रावर्तन पार पडले. श्रावणात दररोज गणेशाला १००१ दुर्वांच्या जुड्या वाहिल्या जातात. सायंकाळी मोरया गोसावी यांच्या आरतीतील काही पदे गाण्यात आली. त्यापूर्वी ‘संगीतसभा’ हा शास्त्रीय संगीताचा कार्यक्रम येथे पार पडला. अंगारकी चतुर्थीनिमित्त चिंचवड देवस्थान ट्रस्टच्या वतीने रक्तदान शिबिराचेही आयोजन करण्यात आले होते. सामाजिक भान राखत अनेक भाविकांनी या शिबिराला उत्स्फूर्त प्रतिसाद दिला.