रघुनाथ पाटील यांच्या गझलांचे वाचन

पिंपरी, ता. १४ ः चिंचवड येथील प्रतिभावंत गझलकार रघुनाथ पाटील यांच्या प्रथम स्मृतिदिनानिमित्त त्यांच्या गझलांचे वाचन करून त्यांना आदरांजली वाहण्यात आली.
महाराष्ट्र साहित्य परिषद पिंपरी चिंचवड, समिधा गझल मंच आणि साहित्य प्रकाश यांच्या संयुक्त विद्यमाने आयोजित या कार्यक्रमात पुणे, पिंपरी चिंचवड व परिसरातील कवी, साहित्यिक, गझलप्रेमींनी सहभाग घेतला. त्यावेळी व्यासपीठावर महाराष्ट्र साहित्य परिषद पिंपरी चिंचवडचे अध्यक्ष राजन लाखे या कार्यक्रमाच्या अध्यक्षस्थानी होते. पद्मश्री गिरीश प्रभुणे, प्रशांत पाटोळे, मकरंद घाणेकर, रघुनाथ पाटील यांचे सुपुत्र किरण पाटील उपस्थित होते. अविनाश सांगोलेकर, गिरीश प्रभुणे, राजन लाखे यांनी मनोगतातून त्यांच्या स्मृतींना उजाळा दिला आणि पाटील यांच्या निर्मल, प्रांजळ, सरळ स्वभावाचा प्रामुख्याने उल्लेख करून रघुनाथ पाटील हे व्यक्तिमत्त्व आयुष्यभर गझलेला कसे पूर्णपणे समर्पित होते याबद्दलच्या भावना व्यक्त केल्या. नीलेश शेंबेकर, सुहास घुमरे, विवेक कुलकर्णी, आत्माराम हारे, अनिल नाटेकर, अशोक भांबुरे, प्रदीप गांधलीकर, अनिल नाटेकर, मेहमुदा शेख, बंडा जोशी, कविता काळे, किरण जोशी, संगीता शिंदे, अरुण कटारे, किरण वेताळ, अनिल कुलकर्णी यांनी स्व. पाटील यांच्या गझलांचे वाचन करून त्यांना आदरांजली वाहिली. प्रशांत पाटोळे यांनी प्रास्ताविक केले. रेखा कुलकर्णी यांनी सूत्रसंचालन केले. मकरंद घाणेकर यांनी आभार मानले.