जुना उर्से टोलनाका परिसरात सुरक्षेची मागणी

सोमाटणे, ता. १४ ः उर्से टोलनाका स्थलांतरानंतर जुना टोलनाका परिसरात पोलिस पथक नसल्याने प्रवाशांच्या सुरक्षेसाठी पथक नेमण्याची मागणी करण्यात आली.
अपुऱ्या लेनमुळे होणारी वाहतूक कोंडी सोडवण्यासाठी चार महिन्यापूर्वी टोलनाक्याचे स्थलांतर मुंबई बाजूस करण्यात आले. टोलनाक्यासह
येथील सुरक्षा यंत्रणाही स्थलांतर झाली. मुंबईला जलद गतीने पोहोचण्यासाठी प्रवासी जुन्या टोल नाक्यावरून प्रवास करत होते. येथे एक वाहक, दोन्ही बाजूला पोलिस चौकी, निवारा शेड, वाहनांची सोय, रात्रीचा भरपूर प्रकाश या सुविधा मिळत होत्या. स्थलांतरानंतर सर्वच सुविधा नवीन टोलनाक्यावर गेल्या असून येथे केवळ एसटी वाहक हीच सुविधा शिल्लक आहे. ड्यूटी संपल्यानंतर तेही रात्री घरी जातात. त्यामुळे येथील प्रवाशांच्या सुरक्षेचा प्रश्‍न निर्माण झाला आहे. त्यासाठी येथे पोलिस पथक, निवारा शेड, एसटी कर्मचाऱ्यांसाठी केबिन, प्रकाशासाठी दिवे, स्वच्छताग्रह, पिण्याचे पाणी इत्यादी सोयी करण्याची मागणी स्थानिकांनी केली आहे.