वेगवेगळ्या कारवायांत सात गुन्हेगारांना अटक

पिंपरी, ता. १६ : पिंपरी-चिंचवड पोलिसांनी विविध ठिकाणी केलेल्या कारवायांत सात गुन्हेगारांना अटक केली. पोलिसांनी आठ पिस्तुलेही जप्त केली.
गुन्हे शाखेच्या गुंडा विरोधी पथकाने इंदोरीतील कारवाईत राकेश येवले (वय ३३, रा. कान्हेवाडी तर्फे चाकण) याच्याकडून दोन पिस्तुले व तीन जिवंत काडतुसे जप्त केली. त्यांच्यावर गंभीर गुन्हे दाखल आहेत.
ताथवडे येथे प्रसाद आठवले (वय २१, रा. जाधववस्ती, नांदेड फाटा, किरकटवाडी) याच्याकडून एक पिस्तूल व एक जिवंत काडतूस जप्त करण्यात आले. नवी सांगवीतील पीडब्ल्यूडी मैदानापाशी सांगवी पोलिसांनी आनंद ऊर्फ पेट्या कोळी (वय २८, रा. इंगवले चौक, पिंपळे निलख) याच्याकडून पन्नास हजार रुपये किमतीचे एक पिस्तूल व एक जिवंत काडतूस जप्त केले. भोसरी पोलिसांनी शांतिनगर येथील कारवाईत जय राजेश चौटालिया (वय १९, रा. दिघी रस्ता, भोसरी) याच्याकडून वीस हजार रुपये किमतीचे एक पिस्तूल व एक काडतूस जप्त केले. देहूरोड पोलिसांनी विकासनगरमधील कारवाईत आदित्य घारू (रा. बापदेवनगर, देहूरोड) याच्याकडून पन्नास हजार रुपये किमतीचे पिस्तूल जप्त केले.
गुन्हे शाखा युनिट चारच्या पथकाने बाबा सैपन शेख (वय २७, रा. राजीव गांधी झोपडपट्टी, पिंपळे गुरव) या अट्टल गुन्हेगारासह त्याचा साथीदार आशिष अनिल कांबळे (वय २५, रा काशीद नगर, पिंपळे गुरव) यांना अटक केली. त्यांच्याकडून दोन पिस्तुले व दोन जिवंत काडतुसे जप्त करण्यात आली.
बाबा शेख हा सराईत गुन्हेगार असून तो करोना काळात येरवडा कारागृह पॅरोलवर बाहेर आला होता. त्यानंतर तो कारागृहात हजर झाला नव्हता. त्याच्यावर १५, तर कांबळेवर दोन गुन्हे दाखल आहेत.
-----------------