गुन्हे वृत्त

नोकरी देण्याच्या बहाण्याने फसवणूक
पिंपरी : नोकरी देण्याच्या बहाण्याने फसवणूक केल्याप्रकरणी दोघांवर गुन्हा दाखल झाला आहे. ही घटना बावधन खुर्द येथे घडली. या प्रकरणी अभिषेक बेलेकर (रा. नवी सांगवी) यांनी बावधन पोलिस ठाण्यात फिर्याद दिली आहे. त्यानुसार पोलिसांनी अमित आंद्रे, हणमंत भोसले यांच्यावर गुन्हा दाखल केला आहे. आरोपी अमित आंद्रे हा दी डेटा टेक लॅब्स कंपनी, बावधन खुर्द (ज्ञानशा टेक्नॉलॉजी सोल्युशन इंडिया प्रायव्हेट लिमिटेड) हिचा ‘सीईओ’ आहे. तर भोसले हा कॉनिक जॉब सोल्युशन कन्सल्टन्सीचा कन्सल्टट आहे. या दोघांनी संगनमत करून फिर्यादीला दी डेटा टेक लॅब्स ही मल्टिनॅशनल कंपनी असल्याचे भासवून फिर्यादीकडून एक लाख रुपये घेतले. त्यापैकी काही रक्कम आरोपी आंद्रे याला देऊन तसेच कंपनीत दोन महिने काम करून घेऊन त्याचा ५० हजार रुपये पगार फिर्यादीला न देता त्यांची दीड लाख रुपयांची फसवणूक केली.

गांधीनगरमध्ये जुगार अड्यावर छापा
पिंपरी : बेकायदा सुरू असलेल्या जुगार अड्ड्यावर संत तुकारामनगर पोलिसांनी छापा टाकला. या कारवाईत पोलिसांनी ३७ हजार ४८० रुपये किंमतीचा मुद्देमाल जप्त केला. ही कारवाई पिंपरीतील गांधीनगर येथे करण्यात आली.
सचिन गायकवाड, राम जाधव, नीलेश हेंद्रे, सतीश वाघमारे, भारत वाघमारे, संजू काळे, दीपक चराटकर (सर्व. रा. पिंपरी) अशी कारवाई झालेल्यांची नावे आहेत.