उद्योगनगरीने केली वारकऱ्यांची सेवा

पिंपरी, ता. २१ : संत तुकाराम महाराज यांची पालखी उद्योगनगरीतून पुणेमार्गे पंढरपूरकडे रवाना झाली. यामध्ये विविध राजकीय पक्ष, सामाजिक संघटना, शाळा-महाविद्यालये, संस्था यांच्या वतीने वारकऱ्यांना वैद्यकीय सेवा, अन्नदान तसेच प्रवासात उपयोगी पडणाऱ्या साहित्याचे वाटप करण्यात आले.

सीआयई ऑटोमॅटिव्ह इंडिया लिमिटेड कंपनीतर्फे निगडी येथे संत तुकाराम महाराजांच्या पालखीमधील वारकऱ्यांना पाणी आणि चहा वाटप करण्यात आले. या वेळी दिंडी प्रमुखांना श्रीफळ देऊन सन्मानित करण्यात आले. श्रीराम हॉस्पिटॅलिटी सर्व्हिसेच्या वतीने वारकऱ्यांची मोफत आरोग्य तपासणी आणि औषध वाटप करण्यात आले. हिंदुस्तान पेट्रोलियमतर्फे निगडी येथे वारकऱ्यांना पाणी आणि बिस्किटाचे वाटप करण्यात आले.

असोसिएशन ऑफ ट्रान्सपोर्टतर्फे वारकऱ्यांना बुंदी वाटप करण्यात आले. तसेच या वेळी दिंडीप्रमुखांचा सत्कार करण्यात आला. समर्थ उद्योग समुहातर्फे लाडू आणि पाणी वाटप करण्यात आले. गुरुकृपा कम्युनिकेशन मार्फत आकुर्डीत वारकऱ्यांना पुलाव वाटप करण्यात आले. गोल्डन लायन ग्रूपतर्फे वारकऱ्यांचे स्वागत करण्यात आले. तसेच वडापाव वाटप करण्यात आले. व्यापारी मित्र मंडळातर्फे आकुर्डीत वारकऱ्यांना पुरीभाजी वाटप करण्यात आली. स्वराज्य बहुउद्देशीय संस्थेतर्फे पाणी आणि राजगिरा लाडू वाटप करण्यात आले. अखिल आकुर्डी व्यापारी मंडळातर्फे अन्नदान करण्यात आले. पिंपरी-चिंचवड आरटीओमार्फत वारकऱ्यांना राजगिरा लाडू आणि वाहतूक नियमांची माहिती देणाऱ्या कापडी पिशवीचे वाटप करण्यात आले.

वारकऱ्यांची मोफत आरोग्य तपासणी
आकुर्डी येथे पालखी मुक्कामस्थळी साई स्पेशालिटी हॉस्पिटलतर्फे मोफत आरोग्य तपासणी आणि औषध वाटप करण्यात आले. तसेच सत्यसाई सेवा संघटनेतर्फे मोफत आरोग्य तपासणी आणि औषध वाटप करण्यात आले. संस्कार प्रतिष्ठानतर्फे देखील मोफत आरोग्य तपासणी शिबिर आयोजित करण्यात आले होते. यावेळी वारकरी आरोग्य तपासणी करुन औषधे घेताना दिसून आले.