‘वायसीएम’चा केसपेपर, शाई हलक्या दर्जाची

पिंपरी, ता.२४ ः यशवंतराव चव्हाण स्मृती रूग्णालयाच्या (वायसीएम) बाह्यरुग्ण विभागातील (ओपीडी) केसपेपरचा कागद आणि त्यावरील शाई हलक्या दर्जाची आहे. त्यामुळे काही दिवसांत अनेकदा कागदावरील रुग्णाचे नाव, केस पेपर क्रमांक निघून जात असल्याची तक्रार रुग्णांनी केली आहे. त्यामुळे, रुग्णांना डिजीटल स्मार्ट कार्ड दिली जावीत, अशी मागणी रुग्णांचे नातेवाईक करत आहेत.
यशवंतराव चव्हाण स्मृती रूग्णालयात रुग्ण उपचारासाठी आल्यावर ओपीडी केस पेपरनुसार त्यांची सर्व माहिती एकाच संगणकामध्ये संकलित केली जाते. मात्र, बाह्यरुग्ण विभागामध्ये तसे होताना दिसत नाही. त्या रुग्णाला पुन्हा १५ दिवसानंतर बोलाविले असता त्या पेपरवर छापलेली शाई निघून जाते. त्यावरील रुग्णाचे नाव आणि ओपीडीचा क्रमांक हा पुसलेला असतो. त्यामुळे एखाद्या रुग्ण वर्षभरात ५ वेळा आला असेल; तर त्या रुग्णांची माहिती ही इतर पाच ठिकाणी संगणकामध्ये संकलित केली जाते. मग, अशावेळी त्या रुग्णावर उपचार होणार तरी कसे ? यासाठी जर रुग्णांची माहिती ही एकाच ठिकाणी संकलित केली असेल; तर डॉक्टरांना रुग्णावर उपचार करणे सोपे जाईल.

रुग्णांना दिले जाणारे केस पेपर आणि त्यावरील शाई ही हलक्या दर्जाची असते. केस पेपर क्रमांक छापल्यानंतर काही दिवसांतच त्यावरची शाई, नाव, आणि क्रमांक हे निघून जातात. त्यामुळे, वायसीएम रूग्णालयाच्या बाह्यरुग्ण विभागातील रुग्णांना डिजिटल स्मार्ट कार्ड देण्यात यावे. जेणेकरून एकाच ठिकाणी रुग्णाची सर्व माहिती संकलित होऊ शकेल.
- यलाप्पा वालदोर, दापोडी

वायसीएम रूग्णालयाच्या बाह्यरुग्ण विभागातील रुग्णांना डिजिटल स्मार्ट कार्ड देण्यासाठी लवकरच उपाययोजना केल्या जाईल.
- अभय दादेवार, वैद्यकीय अधिकारी, यशवंतराव चव्हाण स्मृती रूग्णालय