संवाद नागरीकांचा

चिंचवडगावातील फांदी उचला
चिंचवडगावातील दशक्रिया घाटासमोरील पदपथावर एक महिन्यापासून मोठी फांदी पडून आहे. जवळच कचरा साचला आहे. मोरया यात्री जवळचा कचरा गोळा करतात आणि या फांदीकडे दुर्लक्ष केले जाते. नागरिकांना खूपच त्रास होतो. कृपया फांद्यांचा कचरा लवकर उचला.
- रमेश पाटील, चिंचवडगाव

सस्तेवाडीजवळ पाईप पडून
देहू - आळंदी रस्त्यावरील सस्ते वाडी (मोशी) येथील गुडलक लंचहोमजवळ अनेक दिवसांपासून मुख्य रस्त्यावरील पाईप पडले आहेत. त्यामुळे पदपथावरून येताना - जाताना नागरिकांना त्रास होत आहेत. परिसरात घाण साचली आहे. कृपया महापालिकेने वेळीच दखल घ्यावी.
- निर्गुण थोरे, सस्तेवाडी, मोशी

पथदिवे दुरुस्त करा
दापोडीतील पवार वस्ती येथे विठ्ठल मंदिराजवळ रहिवासी समीर तांबोळी, सलीम शेख यांच्या घरासमोरील पथदिवा गेल्या एक महिन्यापासून बंद आहे. अनेकदा संबंधित अधिकाऱ्यांना तसेच प्रशासनाला तक्रार करुन देखील दिव्यांची दुरुस्त केली जात नाही.
- अकिल अ. शेख, पवार वस्ती, दापोडी

पदपथाचे ब्लॉक नीट बसवा
काँक्रिटीकरण आणि पदपथाचे काम दोन महिन्यांपूर्वी पूर्ण झाले. वाकडमधील पोस्टल कॉलनी येथे पुन्हा एकदा पथदिव्याच्या कामासाठी पदपथाचे पेव्हिंग ब्लॉक काढून टाकण्यात आले. परंतु ते योग्यरित्या दुरुस्त केलेले नाहीत.
- अशोक मोरवाल, वाकड