बौद्ध समाज विकास महासंघाच्या वतीने आज परिसंवादाचे आयोजन

पिंपरी, ता. २८ ः भारतीय संविधान दिनाच्या अमृतमहोत्सवी वर्षानिमित्त बौद्ध समाज विकास महासंघाच्या वतीने शनिवारी (ता. २९) विशेष परिसंवादाचे आयोजन करण्यात आले आहे. पिंपरीतील आचार्य अत्रे रंगमंदिर येथे होणाऱ्या परिसंवादात संविधान अभ्यासक नुरखॉं पठाण यांची प्रमुख उपस्थिती असणार आहे. यामध्ये शहरातील विविध संघटनांचाही सहभाग असणार आहे. ‘बौद्ध समाज विकास महासंघ’ ही संघटना गेल्या दहा वर्षांपासून सामाजिक जागृती अभियानार्तंगत विविध कार्यक्रम राबवत असते. याचाच एक भाग म्हणून हा परिसंवाद आयोजित केला आहे. शनिवारी सायंकाळी ४.३० वाजता या कार्यक्रमाला सुरुवात होईल. तरी जास्तीत जास्त संख्येने नागरिकांनी या परिसंवादासाठी उपस्थित राहावे, असे आवाहन आयोजकांच्या वतीने करण्यात आले आहे.
---