लाचखोर आणि फसवणुकीचा गुन्हा दाखल झालेला पोलिस उपनिरीक्षक सेवेतून बडतर्फ

लाचखोरीप्रकरणी पिंपरीतील
पोलिस उपनिरीक्षक बडतर्फ
पिंपरी, ता. ७ : पिंपरी चिंचवड गुन्हे शाखेच्या आर्थिक गुन्हे शाखेतील पोलिस उपनिरीक्षकाला लाच तसेच आर्थिक फसवणूक प्रकरणी सेवेतून बडतर्फ करण्यात आले. प्रमोद रवींद्र चिंतामणी (वय ३५, रा. दिघी रस्ता, भोसरी, मूळ - कर्जुले हरियाळ, ता. पारनेर) असे त्याचे नाव आहे. पोलिस आयुक्त विनयकुमार चौबे यांनी याबाबतचा आदेश दिला.
गुन्ह्याचा तपास वकिलाच्या अशिलासाठी अनुकूल ठरेल असा करण्यासाठी दोन कोटी रुपयांची लाच मागितल्याचा आरोप चिंतामणीवर आहे. दोन नोव्हेंबरला लाचलुचपत प्रतिबंधक विभागाच्या अधिकाऱ्यांनी ४६ लाख ५० हजारांची लाच स्वीकारताना त्याला रंगेहाथ पकडले होते. त्याच्या घरातून काही रोकड जप्त करण्यात आली होती. त्यामुळे त्याला निलंबित करण्यात आले होते. या कारवाईनंतर त्याने पैसे दुप्पट करून देण्याच्या आमिषाने नागरिकांची आर्थिक फसवणूक केल्याचेही उघड झाले. आर्थिक गुन्हे शाखा एका गुन्ह्याचा तपास करीत आहे. त्यामधील तक्रारदार समोर आल्याने २५ नोव्हेंबरला भोसरी पोलिस ठाण्यात फसवणुकीचा गुन्हा दाखल झाला आहे.
--------------------