शहरात किमान तापमान १४ अंश सेल्सिअसवर

सकाळ वृत्तसेवा
पिंपरी, ता. १० ः पिंपरी चिंचवड शहर आणि परिसरात तापमानाचा पारा गेल्या काही दिवसांपासून घसरत आहे. बुधवारी (ता. १०) १४.२ अंश सेल्सिअस किमान, तर २९.१ अंश सेल्सिअस कमाल तापमानाची नोंद झाली.
गेल्या काही दिवसांपासून उत्तरेकडून येणाऱ्या थंड हवेमुळे राज्यातील तापमानात सतत घट होत आहे. पुण्यासह उत्तर महाराष्ट्रात गारठा वाढला आहे. शहरात मागील आठवड्यात ढगाळ वातावरणामुळे किमान आणि कमाल तापमानात वाढ झाली होती. किमान तापमान २० अंश सेल्सिअस आणि कमाल तापमान ३०.२ अंश सेल्सिअसची नोंद झाली होती. त्यामुळे हवेतील गारवा कमी झाला होता. गेल्या काही दिवसांत किमान तापमानात तीन आणि कमाल तापमानात दोन अंश सेल्सिअसने घट झाली. गारठा वाढल्याने शहरातील चौकाचौकात शेकोट्या पेटत आहेत. उबदार कपड्यांचाही वापर वाढला आहे.
ज्येष्ठ हवामान तज्ज्ञ अनुपम कश्‍यपी यांनी सांगितले की, जम्मू-काश्मीर व हिमाचल प्रदेशमार्गे येणाऱ्या तीव्र थंड हवेमुळे तापमानात मोठी घट झाली आहे. निरभ्र आकाश व कोरड्या हवामानामुळे थंडीसाठी पोषक वातावरण निर्माण झाले आहे. ११ डिसेंबरपर्यंत थंडी कायम राहणार आहे. त्यानंतर रात्रीच्या तापमानात थोडी वाढ होण्याची शक्यता आहे.
-----