पूरमुक्त आयटी पार्कसाठी हालचाली

पिंपरी, ता. ११ : या वर्षी पावसाळ्यात हिंजवडीतील रस्त्यांवर पाणी साचून ‘जलकोंडी’ झाली अन् प्रशासकीय अनास्थेची लक्तरे निघाली. ही परिस्थिती पुन्हा उद्भवू नये, यासाठी १२५ कोटींच्या कामांचा प्रस्ताव मांडण्यात आला आहे. रस्त्यांच्या दुतर्फा नैसर्गिक जलप्रवाह सुरळीत करण्यासाठी जवळपास साडेसतरा किलोमीटर लांबीच्या नाल्यांचे काँक्रिटीकरण केले जाणार आहे. त्याबाजूलाच विद्युत वाहिन्यांसाठी डक्ट तयार करण्यात येणार आहेत, अशी माहिती महाराष्ट्र औद्योगिक विकास महामंडळ (एमआयडीसी) अधिकाऱ्यांनी दिली.

पावसाळ्यात फेज दोन ते फेज तीन दरम्यानच्या डोहलर कंपनी परिसरातील रस्त्यांवर मोठ्या प्रमाणावर पाणी साचले होते. पूरस्थिती निर्माण झाल्याने प्रशासनावर चौफेर टीका झाली. या भागांतील नैसर्गिक नाले बुजविण्यात आल्याने पूरस्थिती निर्माण झाल्याचे अधिकाऱ्यांनी केलेल्या पाहणीत निष्पन्न झाले. नाले बुजविणाऱ्यांना नोटीसही बजावली. भविष्यात अशी परिस्थिती पुन्हा उद्भवू नये, यासाठी ‘एमआयडीसी’ने या भागांच्या सर्वेक्षणासाठी खासगी संस्थेची नेमणूक केली. या संस्थेने ‘पीएमआरडीए’ आणि ‘एमआयडीसी’ हद्दीतील सध्याचे नाले आणि या भागातील दरवर्षीच्या पर्जन्यमानाचा अभ्यास केला. बुजविलेले नाले पुनरुज्जीवित करण्यासह ते किती रुंदी व खोलीचे असावेत, केबलसाठी कुठे वाहिन्या असाव्यात, भूमिगत नाले कुठे बांधावेत याचा अहवाल २७ नोव्हेंबरला प्रशासनाकडे सादर केला आहे.

असे आहे नियोजन
- ‘पीएमआरडीए’ आणि ‘एमआयडीसी’ आपापल्या हद्दीतील नाल्यांचे काम करणार
- ‘एमआयडीसी’ हद्दीतील नैसर्गिक नाल्यांचे खोलीकरण, काँक्रिटीकरण करणार
- नाल्यांच्या बाजूला केबलसाठी वेगळी वाहिनी टाकली जाणार
- कामाच्या मंजुरीसाठी ‘एमआयडीसी’ मुख्यालयाकडे प्रस्ताव पाठविला
- डोंगरावरून येणारे पाणी रस्त्यावर येऊ नये, यासाठी वेगळी वाहिनी टाकण्याचे काम दुसऱ्या टप्प्यात करणार

असा आहे प्रस्ताव
- मुख्य रस्त्याच्या दोन्ही बाजूच्या नाल्यांची एकूण लांबी : १७.४ किलोमीटर
- नाल्यांच्या काँक्रिटीकरणासाठी अंदाजे खर्च : १२५ कोटी रुपये
- कामाचे ठिकाण : छत्रपती शिवाजी महाराज चौक ते मेगापोलिस सर्कल

‘एमआयडीसी’ हद्दीतील एका नाल्यावर अतिक्रमण झाले होते. ते यापूर्वीच पाडले आहे. आम्हाला मिळालेल्या अहवालानुसार, सध्याचे नाले खराब स्थितीत आहेत. त्यामुळे त्यांचे काँक्रिटीकरण केले जाणार आहे. नाल्यांचे प्रवाह पावसाळ्यातही सुरळीत असावेत, यासाठी त्यांचे रुंदीकरण करून खोली वाढविण्यात येईल. हा प्रस्ताव मागील आठवड्यात आम्ही मुख्यालयाकडे मंजुरीसाठी पाठवला आहे.
- राजेंद्र तोतला, कार्यकारी अभियंता, ‘एमआयडीसी’

हिंजवडीमध्ये बांधकामांमुळे नैसर्गिक जलप्रवाह अडविले गेले. त्यामुळे पूरस्थिती निर्माण झाली होती. या बांधकामांना परवानगी कशी आणि कुणाकडून मिळाली? याची चौकशी झाली पाहिजे. ज्यांनी ही अनधिकृत कामे होऊ दिली आणि ज्यांनी केली त्यांच्याकडून १२५ कोटी रुपये वसूल करावेत.’
- ज्ञानेंद्र हलसुरे, अध्यक्ष, हिंजवडी-मान एम्प्लॉई ॲंड रेसिडन्स ट्रस्ट