गुन्हे वृत्त

शेअर मार्केटमध्ये गुंतवणुकीच्या बहाण्याने फसवणूक
पिंपरी : शेअर मार्केटमध्ये गुंतवणूक केल्यास जादा परतावा देण्याचे आमिष दाखवून आर्थिक करण्यात आली. हा प्रकार भोसरी येथे घडला. या प्रकरणी लक्ष्मण सोनबा बोगे (रा. वडमुखवाडी, चऱ्होली) यांनी भोसरी पोलिस ठाण्यात फिर्याद दिली आहे. त्यानुसार पोलिसांनी सिटिफंड फिनसर्व्ह प्रा. ली. या कंपनीचे मालक संजोग डोळस आणि मंगेश डोळस यांच्यावर गुन्हा दाखल केला आहे. आरोपींनी फिर्यादी यांच्याकडून दोन लाख रुपये कंपनीच्या खात्यावर घेतले. त्यानंतर ‘‘शेअर मार्केटमध्ये गुंतवणूक करून चार लाख सहा हजार ८०० रुपये परतावा देतो,’’ असे आश्वासन दिले. मात्र, काहीही परतावा दिला नाही.

कामगाराला मारहाण करणाऱ्या तिघांवर गुन्हा
पिंपरी : तिघांनी मिळून कामगाराला बेदम मारहाण केली. या प्रकरणी तिघांवर गुन्हा दाखल झाला आहे. ही घटना बावधन परिसरातील उत्तमनगर येथे घडली. शिवम रामकरन पांडे (रा. बावधन) असे मारहाण झालेल्याचे नाव आहे. त्यांनी या प्रकरणी बावधन पोलिसांत फिर्याद दिली आहे. त्यानुसार पोलिसांनी आशिष चव्हाण, राकेश चव्हाण (दोघेही रा. उत्तमनगर, बावधन) आणि त्याच्या एका अनोळखी साथीदारावर गुन्हा दाखल केला आहे. आरोपी आणि फिर्यादी पांडे हे उत्तमनगर बावधन येथील पुराणिक लेबर कॅम्पमध्ये राहतात. दरम्यान, पांडे हे जेवणाचा डबा घेऊन जात असताना आरोपींनी त्यांना मारहाण करून शिवीगाळ केली. त्यानंतर आरोपी आशिष चव्हाण याने त्यांना दगडाने मारून जखमी केले.

गांजा बाळगल्याप्रकरणी दोघांना अटक
पिंपरी : चऱ्होली व देहूरोड येथे पोलिसांनी केलेल्या दोन वेगवेगळ्या कारवाईत बेकायदारित्या गांजा बाळगणाऱ्या दोघांना अटक केली. चऱ्होली बुद्रुक येथील कारवाईत सुब्रत सुधीर मंडल (५३, चऱ्होली, पुणे. मूळ रा. पश्चिम बंगाल) याला अटक केली. त्याच्याकडून २५ हजार ५५० रुपये किमतीचा गांजा जप्त करण्यात आला आहे. त्याने हा गांजा विक्री करण्यासाठी आणल्याचे तपासात समोर आले आहे. तर देहूरोड येथील लोहमार्गालगत केलेल्या कारवाईत विजयकुमार श्रीकृष्ण चौधरी (रा. मुख्य बाजारपेठ, देहूरोड) याला अटक केली. त्याच्याकडून १४ हजार ६०० रुपये किंमतीचा गांजा जप्त केला.

अमली पदार्थ बाळगणाऱ्याला अटक
पिंपरी : विक्रीसाठी मेफेड्रॉन (एमडी) हा अमली पदार्थ जवळ बाळगणाऱ्या एकाला केळवाडी पोलिसांनी अटक केली. ही कारवाई थेरगाव येथील काळेवाडी फाटा येथे करण्यात आली. प्रथम गणेश पसाले (रा. मंगलनगर, थेरगाव) असे अटक केलेल्या आरोपीचे नाव आहे. त्याच्याकडून पाच ग्रॅम एमडी हा अमली पदार्थ व एक मोबाईल असा एकूण साठ हजार रुपये किमतीचा मुद्देमाल जप्त केला.

अल्पवयीन मुलाकडून दोन पिस्तूल जप्त
पिंपरी : पिस्तूल बाळगणाऱ्या अल्पवयीन मुलाला पिंपरी पोलिसांनी ताब्यात घेतले. त्याच्याकडून दोन पिस्तूल जप्त करण्यात आली. ही कारवाई पिंपरी पुलाजवळ करण्यात आली. त्यानुसार अल्पवयीन मुलासह त्याने ज्या व्यक्तीकडून पिस्तूल आणले तो पप्पी सिंग (रा. मध्य प्रदेश) याच्यावर पिंपरी पोलिस ठाण्यात गुन्हा दाखल झाला आहे.