तळवडे अपघाताशी आमचा काहीही संबंध नाही

पिंपरी, ता. ११ : पीएमपी बसने दोन बहिणींना चिरडल्याची घटना मंगळवारी (ता.९)  तळवडेत घडली होती. यात नऊ वर्षांच्या मुलीचा जागीच मृत्यू झाला तर, तिची गर्भवती बहीण गंभीर जखमी झाली. पण, याबाबत किमान विचारपूस करण्यासाठी पीएमपीचे अधिकारी रुग्णालयात गेलेले नाहीत. उलट, ‘‘बस ठेकेदाराची असल्यामुळे मदतही तोच करेल. अपघाताशी आमचा काही संबंध नाही,’’ अशी भूमिका त्यांनी ‘सकाळ’शी बोलताना मांडली आहे.
या अपघातात सुधा बिहारीलाल वर्मा (वय ९) हिचा मृत्यू झाला, तर तिची गर्भवती बहीण राधा राम वर्मा (वय २७) गंभीर जखमी झाल्या. अपघातानंतर राधा यांना म्हाळुंगे येथील खासगी रुग्णालयात दाखल करण्यात आले. पण, प्रकृती गंभीर असल्याने त्यांना अधिक उपचारासाठी ससून रुग्णालयात दाखल करण्यात आले आहे. त्यांच्या अर्भकांचा मृत्यू झाला आहे. पण, इतका गंभीर अपघात होऊनही ‘पीएमपी’ प्रशासनाकडून त्यांना काहीही मदत मिळालेली नाही. अपघात होऊन दोन दिवस उलटूनही विचारपूस केलेली नाही. पीएमपीचे एकही अधिकारी आले नसल्याचे राधा यांचे पती राम यांनी सांगितले. दरम्यान, सुधा हिच्या पार्थिवावर गुरुवारी (ता. ११) कासारवाडी स्मशानभूमीत अंत्यसंस्कार करण्यात आले.

राधा यांची प्रकृती चिंताजनक
राधा वर्मा यांची प्रकृती गंभीर असल्याने शस्रक्रिया गुरुवारी (ता. ११) सायंकाळपर्यंत झालेली नव्हती. शिवाय, त्यांच्या डाव्या हाताला गंभीर दुखापत झाली असून तो खांद्यापासून काढावा लागणार आहे.

अपघातातील जखमींना आम्ही ५० हजार रुपयांपर्यंत मदत करतो. पण, त्या रुग्णालयाने कोटेशन दिल्यावर ती मदत करतो. ती मदत रुग्णांच्या नावाने दिली जात नाही, तर रुग्णालयाच्या नावाने करतो.
- किशोर चव्हाण, जनसंपर्क अधिकारी, पीएमपीएमएल