उद्योगनगरीतील प्रकल्पांसाठी निधी द्यावा

पिंपरी, ता. ११ : विधिमंडळाच्या हिवाळी अधिवेशनात भाजप आमदार महेश लांडगे यांनी उद्योगनगरी पिंपरी चिंचवड शहराच्या विकासासंदर्भातील दहा मागण्या मांडल्या. ‘‘शहराच्या सर्वंकष आणि शाश्वत विकासाशी निगडित विविध प्रकल्पांसाठी आवश्यक निधी व तत्काळ कार्यवाही करावी,’’ अशी मागणीही त्यांनी केली.

आमदार लांडगे यांनी प्रामुख्याने ‘‘पवना जलवाहिनी प्रकल्पाचे स्थानिक शेतकऱ्यांना विश्वासात घेऊन तातडीने काम सुरू करावे, मुळशी आणि चासकमान धरणातून अतिरिक्त जलस्रोत व स्वतंत्र कोटा मिळावा. वाढत्या लोकसंख्येला आवश्यक पाणीपुरवठा सुनिश्चित करण्यासाठी ठोस उपाययोजना कराव्यात, राज्यातील सर्व महापालिकांत भटक्या गोवंशासाठी गोशाळा अनिवार्य करावा, मराठा समाजाच्या वारस नोंदींसाठी सकारात्मक निर्णय महायुती सरकारने घ्यावी,’’ याकडेही लक्ष वेधले.
तसेच, ‘‘पिंपरी चिंचवडमधील कचरा व्यवस्थापन सक्षम करण्यासाठी ‘वेस्ट टू एनर्जी’ प्रकल्पाचा दुसरा टप्पा आवश्यक आहे, पवना व मुळा या नद्यांच्या व्यापक स्वच्छता व पर्यावरण सुधार प्रकल्पासाठी निधी उपलब्ध करून द्यावा, आयटी व औद्योगिक पट्ट्यातील वाहतूक कोंडी सोडविण्यासाठी तातडीने उपाययोजना कराव्यात; हिंजवडी, वाकड, पिंपळे सौदागर, भोसरी, चाकण, निगडी, मोशी, वाघोली या भागांना जोडणाऱ्या मेट्रोच्या तीन नवीन मार्गिका त्वरित मंजूर कराव्यात; जलद सेवा आणि तक्रार निवारणासाठी पिंपरी चिंचवडमध्ये महावितरणचे स्वतंत्र मंडळ कार्यालय असावे, संविधान आणि विविध देशांच्या राज्यघटनांचा अभ्यास केंद्र अर्थात संविधान भवन व आंतरराष्ट्रीय दर्जाच्या लायब्ररीसाठी निधी उपलब्ध द्यावा,’’ अशा मागण्याही लांडगे यांनी मांडल्या.

पिंपरी चिंचवडच्या विकासाचा प्रत्येक मुद्दा सभागृहाच्या केंद्रस्थानी ठेवला आहे. शहराला निधी मिळवून देणे माझी वचनबद्धता आहे. मुख्यमंत्री देवेंद्र फडणवीस यांच्या मार्गदर्शनाखाली पिंपरी चिंचवडला विकासाची नवी दिशा मिळाली आहे. वर्षानुवर्षे प्रलंबित प्रश्न मार्गी लागत आहेत.
- महेश लांडगे, आमदार, भाजप