भूमिगत टाकीत पडून महिलेचा मृत्यू

पिंपरी, ता. ११ : भूमिगत टाकीत पडून सफाईचे काम करणाऱ्या महिलेचा मृत्यू झाला. ही घटना डुडुळगाव येथील वहिलेनगर येथे गुरुवारी (ता. ११) दुपारी घडली.
आशाबाई ढोणे (वय ४५, रा. वहिलेनगर, डुडुळगाव) असे या घटनेत मृत्यू झालेल्या महिलेचे नाव आहे. त्या यशदा स्प्लेंडर पार्क येथील इमारतीत साफसफाईसाठी यायच्या. गुरुवारीही त्या नेहमीप्रमाणे आल्या. दरम्यान, सोसायटीत भूमिगत पाण्याची टाकी असून त्या टाकीचे झाकण व्यवस्थित लावलेले नसल्याने ढोणे टाकीत पडल्या. काही वेळाने सुरक्षारक्षक परिसरात पाहणी करीत असताना टाकीच्या ठिकाणी झाडू आढळला. त्यावेळी सुरक्षारक्षकाने डोकावून पहिले. त्यावेळी आशाबाई पाण्यात पडल्याचे समोर आले. याची अग्निशमन दलाला याबाबत माहिती देण्यात आली. जवानांनी ढोणे यांना बाहेर काढले. उपचारासाठी त्यांना रुग्णालयात दाखल केले. मात्र, त्यांना डॉक्टरांनी मृत घोषित केले.