लाच मागणारा परिमंडळ अधिकारी सापळ्यात

पिंपरी, ता. ११ : शिधापत्रिका मंजूर करण्यासाठी पैसे घेणाऱ्या भोसरी अन्नधान्य वितरण कार्यालय परिमंडळ ‘फ’ अधिकाऱ्याला पकडण्यात आले. ही कारवाई गुरुवारी (ता. ११) दुपारी करण्यात आली.
गजानन देशमुख (रा. तळजाई पठार, धनकवडी) असे या अधिकाऱ्याचे नाव आहे. यातील तक्रारदार यांचे मित्र व ओळखीचे अशा चौदा जणांनी शिधापत्रिकेसाठी प्रत्येकी ५० रुपये ऑनलाइन भरले. यावर तक्रारदार हे शिधापत्रिका मिळण्यासाठी देशमुख यांना भेटले, त्यावेळी त्यांनी पैशांची मागणी केली. याबाबत तक्रारदार यांनी लाचलुचपत प्रतिबंधक विभागाकडे तक्रार दिली. याची पडताळणी केली असता, देशमुख यांनी दहा शिधा पत्रिकेसाठी प्रत्येकी दीड हजार व उर्वरित चार शिधा पत्रिकेसाठी प्रत्येकी एक हजार रुपये असे चौदा शिधापत्रिकेसाठी १९ हजार रुपयांची मागणी केली. त्यानंतर तडजोडीअंती सोळा हजार रुपये स्वीकारताना पथकाने देशमुख यांना पकडले.