‘पीएमआरडीए’ करणार तीस भूखंडांचा लिलाव

पिंपरी, ता. १३ : पुणे महानगर प्रदेश विकास प्राधिकरणाने (पीएमआरडीए) पिंपरी-चिंचवड महानगरपालिका, पुणे ग्रामीण हद्दीतील भूखंड प्रथमच ८० वर्षांच्या दीर्घ मुदतीच्या भाडेपट्ट्यावर देण्याचा निर्णय घेतला आहे. विविध कारणांसाठी उपयोगात येणाऱ्या ३० भूखंडांचा यात समावेश आहे. ऑनलाइन ई-लिलाव पद्धतीने भूखंड वाटपासाठी उपलब्ध करण्यात आले आहेत.
महानगरपालिका हद्दीतील भूखंडांमध्ये शैक्षणिक वापराच्या तीन भूखंड, वाणिज्य व सार्वजनिक सुविधांसाठी नऊ, वैद्यकीय वापर, सार्वजनिक सुविधा (ग्रंथालय/संगीत शाळा) आणि एक सुविधा केंद्र (फॅसिलिटी सेंटर) यांसाठी प्रत्येकी एका भूखंडाचा यात समावेश आहे. याशिवाय, पुणे ग्रामीण हद्दीतील १४ सुविधा भूखंड तसेच भांबुर्डा येथील एका वाणिज्य भूखंडाचाही ई-लिलाव करण्यात येईल. या भूखंडांचे वाटप पात्र आणि इच्छुक व्यक्ती अथवा संस्थांना केले जाईल. या ई-लिलाव प्रक्रियेच्या अटी व शर्तींची सविस्तर माहिती https://eauction.gov.in आणि पीएमआरडीएचे अधिकृत संकेतस्थळ www.pmrda.gov.in वर पाहण्यासाठी उपलब्ध आहे.
इच्छुक व्यक्ती आणि संस्थांनी ई-लिलाव प्रक्रियेत सहभागी व्हावे, असे आवाहन आयुक्‍त डॉ. योगेश म्‍हसे यांनी केले आहे.
---
अशी असेल प्रक्रिया -
- नोंदणी व कागदपत्रे डाऊनलोड करण्याची मुदत १५ डिसेंबरला सकाळी १० ते १३ जानेवारीला सायंकाळी पाच वाजेपर्यंत
- तांत्रिकदृष्ट्या पात्र बोलीदारांची घोषणा २२ जानेवारीला
- अंतिम ई-लिलाव प्रक्रिया २३ जानेवारीला सकाळी ११ पासून
---