रस्ता दुरवस्थेमुळे अपघात झाल्यास फिर्यादीत उल्लेख करा

पिंपरी, ता. १५ ः अपघात रस्त्यावरील खड्ड्यांमुळे, खड्डा चुकविताना, रस्त्यावर पसरलेली खडी/कच, रस्ता निसरडा असल्यामुळे किंवा रस्त्याच्या दुरवस्थेमुळे झाला असेल, तर तसा स्पष्ट उल्लेख फिर्यादीत आणि पंचनाम्यात करावा, अशी मागणी नागरिकांनी केली आहे.
पोलिस रेकॉर्डवर कारण स्पष्ट असल्यास, जखमी नागरिकांना किंवा मृताच्या वारसांना महापालिकेकडून मिळणारी नुकसान भरपाईचा दावा करणे सोपे होईल व त्यांना न्याय मिळेल.
नुकतेच पिंपरी चिंचवड महापालिकेने एक जाहीर निवेदन प्रसिद्ध केले आहे. त्यानुसार, मुंबई उच्च न्यायालयाने १३ ऑक्टोबर रोजी दिलेल्या आदेशान्वये, शहरातील रस्त्यांवरील खड्ड्यांमुळे अपघात होऊन कोणी जखमी झाल्यास किंवा जीव गमावल्यास, त्यांना महापालिकेकडून ‘नुकसान भरपाई’ मिळण्याची तरतूद करण्यात आली आहे. यासाठी शहर अभियंता कार्यालयात पुराव्यानिशी अर्ज करणे आवश्यक आहे. रस्त्यावरील अपघातांची नोंद पोलिस ठाण्यात किंवा हॉस्पिटल चौकीत केली जाते, तेव्हा अपघाताचे नेमके कारण (खड्डा चुकविताना, खडीवरून घसरून) स्पष्टपणे नमूद केले जात नाही. अनेकदा केवळ ‘वेगात गाडी घसरली’ किंवा ‘ताबा सुटला’ अशी मोघम नोंद केली जाते. पोलिस दप्तरी अपघाताचे कारण स्पष्ट नसल्यास, पीडित नागरिकांना उच्च न्यायालयाच्या आदेशानुसार महापालिकेकडून नुकसान भरपाई मिळवण्यात तांत्रिक अडचणी येऊ शकतात. त्यामुळे अपघाताची नोंद करताना यापुढे कोणत्याही अपघाताची फिर्याद, खबर किंवा स्टेशन डायरी नोंद करताना, तो अपघात रस्त्याच्या खराब स्थितीमुळे झाला आहे का? याची खात्री करावी. जर अपघात रस्त्यावरील खड्ड्यांमुळे, खड्डा चुकविताना, रस्त्यावर पसरलेली खडी/कच, रस्ता निसरडा असल्यामुळे किंवा रस्त्याच्या दुरवस्थेमुळे झाला असेल, तर तसा स्पष्ट उल्लेख फिर्यादीत आणि पंचनाम्यात करण्याबाबत अंमलदारांना आदेश द्यावेत, अशी मागणी नागरिकांकडून करण्यात आली आहे.

रस्त्याच्या खराब स्थितीमुळे अपघात झाला असेल तर तसा स्पष्ट उल्लेख फिर्यादीत आणि पंचनाम्यात करण्याबाबत अंमलदारांना संबंधित प्रशासनाने आदेश द्यावेत. नागरिकांचे हित लक्षात घेता पिंपरी चिंचवड पोलिस आयुक्तालयाच्या हद्दीतील सर्व पोलिस ठाण्यांना मार्गदर्शक सूचना देण्यात याव्यात. आपल्या एका आदेशामुळे अनेक अपघातग्रस्त नागरिकांना मोठा आर्थिक दिलासा मिळू शकतो.
-अमोल शिंदे, नागरिक