मोटारीवर दगडफेक; महिलेच्या डोळ्याला दुखापत

पिंपरी, ता. १५ : भरधाव दुचाकी ओव्हरटेक करताना दुचाकीला धक्का लागला. त्यावेळी हॉर्न वाजवल्याच्या रागातून दुचाकीवरील तिघांनी मोटारीवर दगडफेक केली. यात मोटारीची काच फुटून महिलेच्या डोळ्याला गंभीर दुखापत झाली आहे. ही घटना पुनावळेतील गायकवाडनगर व भुयारी मार्गाजवळ घडली.
या प्रकरणी पूजा सुभाषचंद्र गुप्ता (रा. चेंबूर कॅम्प, मुंबई पूर्व) यांनी रावेत पोलिस ठाण्यात फिर्याद दिली आहे. त्यानुसार पोलिसांनी निखिल जालिंदर धांडे (वय २१) व तन्मय सुधाकर पोखरकर (वय २२, दोघेही रा. गायकवाडनगर, पुनावळे) यांना अटक केली. तर त्यांचा साथीदार फरार आहे. फिर्यादी या पतीसह मोटारीतून पुनावळे बस थांब्याकडे जात होत्या. त्यावेळी दुचाकीवरून आलेले तिघे ओव्हरटेक करून जात होते. त्यावेळी दुचाकीला मोटारीचा थोडा धक्का लागल्याने फिर्यादीच्या पतीने हॉर्न वाजवला. त्यावर आरोपींना राग आला. त्यांनी दुचाकी आडवी लावत मोटारीवर दगड मारला. यामुळे घाबरल्याने फिर्यादी हे पुनावळे अंडरपासच्या दिशेने निघाले. तेथे फिर्यादी यांची मोटार वाहतूक कोंडीत अडकली. आरोपी तेथे पाठीमागून आले. त्यांनी दगडफेक करून मोटारीच्या काच फोडल्या. त्यामध्ये एक तुकडा पूजा यांना लागल्याने डोळ्याला गंभीर दुखापत झाली. त्यानंतर आरोपी तेथून पसार झाले होते.