दिग्विजय पाटील बावधन पोलिसांसमोर हजर

पिंपरी, ता. १५ : मुंढवा येथील जमीन खरेदी-विक्री गैरव्यवहार प्रकरणातील अमेडिया कंपनीतील भागीदार दिग्विजय पाटील हे सोमवारी (ता. १५) बावधन पोलिसांसमोर हजर झाले. या प्रकरणी त्यांची सायंकाळी उशिरापर्यंत चौकशी सुरू होती.

या प्रकरणात सह जिल्हा निबंधक संतोष हिंगाणे यांनी बावधन पोलिसांत फिर्याद दिलेली आहे. त्यानुसार या जमीन विक्रीबाबत कुलमुखत्यारधारक शीतल तेजवानी, अमेडिया इंटरप्रायजेस एलएलपी कंपनीचे भागीदार दिग्विजय पाटील आणि दस्त नोंदणी करणारे सह दुय्यम निबंधक रवींद्र तारू यांच्याविरुद्ध बावधन पोलिस ठाण्यात सहा नोव्हेंबर रोजी गुन्हा दाखल झाला होता. २० मे २०२५ रोजी सह दुय्यम निबंधक कार्यालय, हवेली क्र. ४ येथे हा व्यवहार झाला होता. या दस्तातील पक्षकांरांनी दस्त नोंदणी करताना नजराणा व मुद्रांक शुल्काबाबत शासनाची आर्थिक फसवणूक केल्याचे समोर आले. शासनाच्या नियमांनुसार या जमिनीचा खरेदी-विक्री दस्त करताना पाच कोटी ८९ लाख ३१ हजार रुपये इतके मुद्रांक शुल्क भरणे आवश्यक होते. तरीही आरोपींनी संगनमत करून शासनाला देय असलेले सुमारे सहा कोटी रुपये मुद्रांक शुल्क न भरता फसवणूक केली.
या प्रकरणात शीतल तेजवानीला पुणे पोलिसांनी अटक केली. तर, बावधन पोलिसांनी आरोपी रवींद्र तारूला अटक केली. हे दोघेही सध्या पोलिस कोठडीत आहेत. तर, गुन्हा दाखल झाल्यापासून दिग्विजय पाटील हे सव्वा महिन्यानंतर स्वत:हून चौकशीसाठी बावधन पोलिस ठाण्यात हजर झाले.

रवींद्र तारूच्या कोठडीत चार दिवसांची वाढ
या प्रकरणातील दस्त नोंदणी रवींद्र तारू याच्या अधिकारात झालेली असल्याचे स्पष्ट झाले होते. त्यानुसार त्यांना सात डिसेंबरला भोर येथील घरातून अटक करण्यात आली होती. त्यांना पौड न्यायालयात हजर केले असता न्यायालयाने सुरुवातीला आठ दिवसांच्या पोलिस कोठडीत ठेवण्याचे आदेश दिले होते. ही मुदत सोमवारी (ता. १५) संपल्याने पुन्हा न्यायालयात हजर केले असता १९ डिसेंबरपर्यंत कोठडीत वाढ करण्यात आली.