अनधिकृत जाहिरात फलकांवर धडक कारवाई

पिंपरी, ता. १६ : महापालिका निवडणुकीची आचारसंहिता लागू झाली आहे. तिच्या पालनासाठी महापालिका क्षेत्रातील चार हजार ८१९ अनधिकृत जाहिरात फलक मंगळवारी (ता. १६) हटविण्यात आले. यात राजकीय फ्लेक्स, बॅनर्स, किऑस्क, स्टीकर्स, होर्डिंग, चिन्हे, ध्वज, फलक, भिंतीवरील राजकीय जाहिराती आदींचा समावेश आहे.
‘‘निवडणूक आयोगाच्या आदेशानुसार महापालिकेच्या आकाशचिन्ह व परवाना विभागाने शहरातील प्रमुख चौक, मुख्य रस्ते, सार्वजनिक ठिकाणे, शासकीय इमारतींच्या परिसरात लावलेल्या अनधिकृत फलकांवर कारवाई सुरू केली आहे. त्यास संबंधित राजकीय पक्ष, पदाधिकारी व कार्यकर्त्यांनी महापालिकेला सहकार्य करावे, तसेच पुढील काळात कोणत्याही स्वरुपात आचारसंहितेचा भंग होईल असे साहित्य लावू नये,’’ असे आवाहन प्रशासनाने केले आहे.

निवडणूक प्रक्रियेत आचारसंहितेची अंमलबजावणी अत्यंत महत्त्वाची आहे. कोणत्याही प्रकारचा अनुचित प्रभाव टाळण्यासाठी प्रशासनाने वेळेत प्रतिबंधात्मक उपाय राबविले असून, सर्वांनी नियमांचे पालन करणे अपेक्षित आहे.
- श्रावण हर्डीकर, आयुक्त तथा निवडणूक अधिकारी, महापालिका