शीतल तेजवानीला सात दिवस कोठडी

पिंपरी, ता. १६ : मुंढवा येथील जमीन खरेदी-विक्री गैरव्यवहारातील आरोपी शीतल किशनचंद तेजवानी हिला बावधन पोलिसांनी मंगळवारी (ता. १६) येरवडा कारागृहातून ताब्यात घेऊन अटक केली.
शीतल तेजवानीला पुणे शहर पोलिसांनी अटक केली होती. तिच्या पोलिस कोठडीची मुदत संपल्यानंतर न्यायालयाने तिची रवानगी येरवडा कारागृहात केली होती. बावधन पोलिसांनी मंगळवारी (ता. १६) न्यायालयाचे प्रोड्यूस वॉरंट घेऊन येरवडा कारागृहातून तेजवानी हिला ताब्यात घेऊन अटक केली. त्यानंतर तिला पौड न्यायालयात हजर करण्यात आले. न्यायालयाने सात दिवस म्हणजे २३ डिसेंबर पर्यंत तिला पोलिस कोठडीत ठेवण्याचे आदेश दिले.
या प्रकरणात सह जिल्हा निबंधक संतोष हिंगाणे यांनी बावधन पोलिसांत फिर्याद दिले आहे. त्यानुसार कुलमुखत्यारधारक शीतल तेजवानी, अमेडिया एन्टरप्रायजेस एलएलपी कंपनीचे भागीदार दिग्विजय पाटील आणि दस्त नोंदणी करणारे सह दुय्यम निबंधक रवींद्र तारू यांच्याविरुद्ध बावधन पोलिस ठाण्यात सहा नोव्हेंबरला गुन्हा दाखल झाला आहे. रवींद्र तारू हा १९ डिसेंबर पर्यंत पोलिस कोठडीत आहे. दिग्विजय पाटील यांची पोलिसांनी सोमवारी (ता. १५) दिवसभर कसून चौकशी केली.
==================