कुणाला प्रवेश द्यायचा हे वरिष्ठ ठरवतील

पिंपरी, ता. १७ : पिंपरी चिंचवड महापालिकेच्या निवडणुकीचे बिगूल वाजताच गेली अनेक महिन्यांपासून अंतर्गत विरोधासह काही कारणास्तव रखडलेले अन्य पक्षांतील स्थानिक नेत्यांचे पक्ष प्रवेश उद्या गुरुवारी (ता. १८) होणार असल्याचे विश्‍वनीसनीयरित्या समजते. पक्षांतर्गत विरोधाला न जुमानता ‘पक्ष वाढीसाठी ताकदीचे लोक येत असतील तर पक्षात प्रवेश दिला जाईल. कुणाला प्रवेश द्यायचा, कुणाला नाही हे आम्ही वरिष्ठ ठरवू, तुम्ही सांगू नका,’ अशा शब्दांत प्रदेशाध्यक्ष रवींद्र चव्हाण यांनी स्थानिक नेत्यांना सुनावत प्रवेशाचा मार्ग मोकळा केल्याचे कळते.
विधानसभेच्या निकालानंतर राज्यात महायुतीची सत्ता आल्यानंतर सत्तेची फळे चाखण्यासाठी भाजपमध्ये जाण्यासाठी शहरातील अनेक दिग्गजांनी प्रयत्न सुरु केले होते. पक्षात गेल्या दोन-तीन वर्षांपासून जोमाने तयारी केलेले स्थानिक कार्यकर्ते यामुळे दुखावले गेले आहेत. त्यामुळे शहराच्या विविध भागांतील तयारी केलेल्या पक्षाच्या निष्ठावंत कार्यकर्त्यांचा बाहेरून पक्षात येणाऱ्यांना कडाडून विरोध होता. राष्ट्रवादी काँग्रेस शरदचंद्र पवार पक्षाचे स्थानिक नेते राहुल कलाटे त्यांच्या पाच माजी नगरसेवक समर्थकांसह तसेच पाच निवडून येण्याची क्षमता असणाऱ्या प्रमुख कार्यकर्त्यांसह भाजपमध्ये प्रवेश करणार असल्याची चर्चा गेल्या अनेक महिन्यांपासून राजकीय वर्तुळात होती. कलाटे यांनी मुख्यमंत्री देवेंद्र फडणवीस यांची भेट घेतल्यामुळे त्यांचा व त्यांच्या समर्थकांचा प्रवेश निश्‍चित झाला आहे. यामध्ये माजी नगरसेवक अमित गावडे, नवनाथ जगताप, रेखा दर्शिले, अश्‍विनी वाघमारे, मीनल यादव यांच्या नावांचीही चर्चा आहे.
कलाटे यांच्या प्रवेशाला भाजपचे आमदार शंकर जगताप, शहराध्यक्ष शत्रुघ्न काटे आदींचा विरोध होता. काही दिवसांपूर्वी जगताप व काटे यांच्या नेतृत्वाखाली एक शिष्टमंडळ प्रदेशाध्यक्ष चव्हाण यांना भेटले व त्यांनी विरोध दर्शविला. परंतु; चव्हाण यांनी त्यांना पक्षाची भूमिका ‘आपल्या पद्धतीने’ समजावून सांगितल्याचे समजते. अमित गावडे यांनाही प्राधिकरणातील भाजयुमोचे माजी प्रदेशाध्यक्ष अनुप मोरे यांच्यासह भाजपच्या पदाधिकाऱ्यांचा, कार्यकर्त्यांचा विरोध होता.
शिवसेना उद्धव बाळासाहेब ठाकरे पक्षाचे प्रभारी शहर प्रमुख व मावळ लोकसभा लढविलेले संजोग वाघेरे व त्यांच्या पत्नी राष्ट्रवादी काँग्रेसच्या माजी स्थायी समिती अध्यक्षा उषा वाघेरे यांचाही भाजप प्रवेश निश्‍चित झाल्याचे वृत्त आहे. उषा वाघेरे काल मंगळवारी (ता. १६) राष्ट्रवादीच्या मुलाखतींनाही गैरहजर असल्याचे समजते. संजोग वाघेरे यांच्या नावासाठी आमदार महेश लांडगे यांची राष्ट्रीय स्वयंसेवक संघामार्फत शिफारस होती. संजोग वाघेरे यांच्या नावाला भाजपचे स्थानिक माजी नगरसेवक संदीप वाघेरे यांनी यापूर्वीही व आज बुधवारी (ता. १७) झालेल्या पक्षाच्या इच्छुक उमेदवारांच्या मुलाखतीवेळीही कडाडून विरोध केला. आमदार शंकर जगताप, उमा खापरे, अमित गोरखे व शहराध्यक्ष काटे यांच्या सुकाणू समितीसमोर (कोअर कमिटी) संदीप वाघेरे यांनी, ‘संजोग वाघेरे यांना पक्षात प्रवेश दिल्यास आम्ही पक्षाबाहेर जाऊ, असा इशारा दिल्याचे खात्रीलायक वृत्त आहे.
---

आयुष्यभर सतरंज्याच उचलायच्या का?
सत्ता म्हटले की डोकी माजली जातात. भाजपला येनकेन प्रकारेण पिंपरी चिंचवड महापालिकेत एकहाती सत्ता आणायची आहे. त्यामुळे एखाद्या स्थानिक नेत्यामुळे पक्षाच्या नगरसेवकांची महापालिकेत संख्या वाढत असेल तर पक्ष त्याचाच विचार अगोदर करणार, हे पक्षाच्या नेत्यांचे राजकीय धोरण आहे. परंतु; पक्षात वर्षानुवर्षे निष्ठेने काम करत असलेल्या कार्यकर्त्यांना आयुष्यात एकदा तरी आपली महापालिका निवडणुकीच्या उमेदवारीसाठी वर्णी लागेल व नगरसेवक म्हणून आपण निवडून येवू, अशी भाबडी आशा असते. या पक्ष प्रवेशांमुळे निष्ठावंत कार्यकर्त्यांच्या आशेवर पाणी फेरले जाते व ‘कार्यकर्त्यांनी आयुष्यभर सतरंज्याच उचलायच्या का?’ असा प्रश्‍न ते आपसूकच विचारतात.
-----