महापालिका निवडणुकीसाठी भाजपकडून ८०० मुलाखती

पिंपरी, ता. १७ ः पिंपरी चिंचवड महापालिका निवडणुकीसाठी भारतीय जनता पक्षाने इच्छुकांच्या मुलाखती मंगळवारपासून (ता. १६) सुरू केल्या. बुधवारी (ता. १७) इच्छुकांच्या मुलाखती संपल्या. दोन्ही दिवसांत सुमारे ८०० जणांनी मुलाखती झाल्या. यात माजी नगरसेवकांसह नवीन इच्छुकांचाही समावेश होता.
भाजप आणि राष्ट्रवादी काँग्रेस स्वतंत्रपणे लढणार असल्याचा निर्णय मुख्यमंत्री देवेंद्र फडणवीस यांनी जाहीर केला आहे. त्याला राष्ट्रवादी काँग्रेसचे अध्यक्ष अजित पवार यांनीही दुजोरा दिला आहे. यापाठोपाठ महापालिका निवडणुकांचा कार्यक्रम राज्य निवडणूक आयोगाने जाहीर केला. त्यामुळे भाजपनेही तयारीला गती दिली आहे. त्यासाठी इच्छुकांच्या मुलाखती पिंपरी मोरवाडीतील पक्ष कार्यालयात घेण्यात आल्या.
भोसरी विधानसभा मतदारसंघाचे आमदार महेश लांडगे, चिंचवडचे आमदार शंकर जगताप, विधानपरिषदेच्या सदस्या उमा खापरे, विधानपरिषदेचे सदस्य अमित गोरखे आणि पक्षाचे शहराध्यक्ष शत्रुघ्न काटे यांनी मुलाखती घेतल्या. पहिल्या दिवशी प्रभाग एक ते १६ आणि दुसऱ्या दिवशी प्रभाग १७ ते ३२ मधील इच्छुकांच्या मुलाखती झाल्या. मुलाखती झाल्या असून त्याबाबतचा सविस्तर अहवाल कोअर कमिटीपुढे जाईल. कोअर कमिटी इच्छुकांची विकासकामे व पक्षातील कार्याचा लेखाजोखा पाहून प्राधान्यक्रमाने नावे निश्चित करतील. त्यांची यादी प्रदेश कार्यकारिणीकडे जाईल. त्यानंतर उमेदवारीबाबत निर्णय जाहीर केला जाईल, असे भाजपचे पिंपरी चिंचवड शहराध्यक्ष शत्रुघ्न काटे यांनी सांगितले.
---